Ազգային ժողովը վաղը կայանալիք արտահերթ նիստում քննարկելու է նոր կառավարության ծրագիրը: Մինչ այդ՝ վարչապետ Կարեն Կարապետյանն այսօր հանդիպել է «Ծառուկյան» եւ Հանրապետական խմբակցությունների հետ, իսկ ՀՅԴ-ին ծրագիրն ավելի վաղ է ներկայացվել: Դաշնակցությունից Աղվան Վարդանյանի գնահատմամբ՝ 2017-2022 թվականներն ընդգրկող ծրագիրը հավակնոտ է եւ ավելի թիրախավորված, քան մինչ այդ ներկայացված ծրագրերը:
Մինչդեռ պատգամավորների թվով խորհրդարանական երկրորդ ուժի՝ «Ծառուկյան» դաշինքի ներկայացուցիչները կարծում են, որ այն զգուշավոր եւ նվազագույն գոյատեւման խնդիր լուծող ծրագիր է: Նաիրա Զոհրաբյանը NEWS.am-ի հետ զրույցում կասկածի տակ է դրել վարչապետի՝ տարեկան 5 տոկոս տնտեսական աճ ապահովելու խոստումը՝ հաշվի առնելով 2017 թվականի առաջին եռամսյակում արձանագրած ցածր՝ 0.4 տոկոս տնտեսական աճը եւ 850 միլիոն դոլարի ներդրումների մասին չիրականացած խոստումը: Զոհրաբյանն ասել է, որ «Ծառուկյան» դաշինքի խորհրդարանական խմբակցությունն այս ծրագրին «կողմ» չի քվեարկելու, իսկ «դեմ»-ի կամ «ձեռնպահ»-ի վերաբերյալ դեռ որոշում չեն կայացրել:
«Ելք» խմբակցության հետ վարչապետը հանդիպելու ցանկություն չի հայտնել։ Փոխարենը առաջարկվել է հանդիպել փոխվարչապետ Վաչե Գաբրիելյանի հետ, նրա հետ էլ հրաժարվել են հանդիպել «Ելք»-ի պատգամավորները: Գեւորգ Գորգիսյանը պարզաբանել է, որ ծրագրի պատասխանատուն Կարեն Կարապետյանն է, ոչ թե Վաչե Գաբրիելյանը, եւ վարչապետը պետք է պատասխաներ իրենց հարցերին կամ ընդուներ առաջարկները: Իսկ կառավարության ծրագիրը, պատգամավորի գնահատմամբ, դեկլարատիվ բնույթ ունի. նկարագրված են խնդիրներ, որոնց լուծման ճանապարհային քարտեզ չկա: Ինչ վերաբերում է քվեարկությանը. «կողմ» չեն քվեարկի, իսկ «դեմ» կամ «ձեռնպահ» դիրքորոշումը կախված է Ազգային ժողովում քննարկումներից:
Հանրապետական խմբակցության քարտուղարը հայտարարել է, որ ծրագիրը հավակնոտ է ու, լավ աշխատանքի դեպքում, կարելի է անգամ գերակատարել ծրագրով նախատեսված խնդիրները: Նախորդ խոստումները չիրականացնելն էլ Գագիկ Մելիքյանը պայմանավորել է Ռուսաստանի դեմ սահմանված պատժամիջոցներով եւ համաշխարհային ֆինանսատնտեսական ճգնաժամով:
Օրեր առաջ արած սկանդալային հայտարարություններից հետո Հայաստանում Եվրամիության դեսպանն այսօր լրագրողներին է հանդիպել՝ իր հայտարարությունների առնչությամբ պարզաբանումներ ներկայացնելու եւ դրանց արձագանքին անդրադառնալու համար: Պյոտր Սվիտալսկին խոսել էր Հայաստանի ընտրական գործընթացների եւ ԿԸՀ-ի կազմը փոխելու անհրաժեշտության մասին, ինչին Դավիթ Հարությունյանն ու Էդուարդ Շարմազանովը կոշտ էին արձագանքել՝ Եվրամիության ներկայացուցչին քաղաքական կոռեկտություն պահպանելու ու երկրի ներքին գործերին չմիջամտելու կոչ անելով: Այսօր Սվիտալսկին ասել է, որ Հայաստանի իշխանություններին հրապարակային հայտարարություններով դիմելու կարիք չունի, իսկ իրեն արձագանքողների համար դեսպանը խորհուրդ ուներ:
Սվիտալսկին վստահեցրել է, որ Եվրամիությունն իր ներկայությունը չի պարտադրում Հայաստանին: Երկրի իշխանություններն իրենք են խնդրել օգնել ընտրական գործընթացի կազմակերպմանը: ԵՄ-ն հսկայական ֆինանսական աջակցություն է ցուցաբերել՝ ավելի քան 7 մլն եվրո, առանց որի, դեսպանի համոզմամբ, հնարավոր չէր լինի այս ընտրություններում նոր տեխնոլոգիաներ ներդնել:
Սվիտալսկու հայտարարությանը Հանրապետականից կրկին արձագանք է հնչել: Էդուարդ Շարմազանովը ԵՄ դեսպանի խոսքում նեղացած մարդու տոնայնություն է նկատել: Ասում է՝ իրենք որեւէ մեկին նեղացնելու մտադրություն չեն ունեցել, պարզապես հստակ արտահայտել են իրենց խնդիրը: Նա էլ իր հերթին է Պյոտր Սվիտալսկուն խորհուրդ տվել հասկանալ, որ ժողովրդավարությունը նախ եւ առաջ կարծիքներ լսելու ունակությունն է, եթե նույնիսկ այդ կարծիքը համահունչ չէ ակնկալածին:
«ԻԳԼԱ»-ի գործով նախաքննության ավարտին Արցախի պաշտպանության նախկին նախարար Սամվել Բաբայանին եւ ազատամարտիկ Սանասար Գաբրիելյանին առաջադրված մեղադրանքները մեղմացվել են: Ռազմամթերքի մաքսանենգության հոդվածով մեղադրանքը հանվել է, հիմա նրանք մեղադրվում են նախնական համաձայնությամբ ապօրինի կերպով զենք, ռազմամթերք ձեռք բերելու, կրելու կամ փոխադրելու հոդվածով: Գաբրիելյանի պաշտպան Կարապետ Աղաջանյանն ասում է՝ իր պաշտպանյալը ցուցմունքում ասել է, որ «ԻԳԼԱ»-ն փորձել է գնել Հայաստանի Զինված ուժերի համար: Պատվիրել է, որ այն արտասահմանից ներմուծեն: Ցուցմունքի համաձայն՝ «ԻԳԼԱ»-ն ներմուծողներից է եղել գործով կալանավորված 3-րդ անձը՝ Արմեն Պողոսյանը, որն այն Հայաստանում է ձեռք բերել ու փորձել է վաճառել Սանասար Գաբրիելյանին: Իսկ Սամվել Բաբայանը փորձել է իր խորհուրդներով օգնել Գաբրիելյանին՝ Զինված ուժերի համար «ԻԳԼԱ»-ն գնելու հարցում:
Խնձորից հետո հիմա էլ ադրբեջանական աղ ու թեյ են փորձել Հայաստան ներկրել: Այս անգամ ներկրումը կանխվել է հենց սահմանին: Բավրայի մաքսակետի աշխատակիցները Վրաստանից Հայաստան ժամանած ավտոմեքենաների մեջ ավելի քան կես տոննա ադրբեջանական ծագմամբ սննդային աղ եւ թեյ են հայտնաբերել: Ուղեւորները վստահեցրել են, որ տեղյակ չեն եղել ապրանքների ծագման մասին: Արդյունքում նրանք հրաժարվել են բեռը հանրապետություն տեղափոխել:
Երեւանում արտակարգ դեպք է տեղի ունեցել: Շենգավիթ վարչական շրջանի Կարմիր բլուր փողոցի հարեւանությամբ գտնվող գերեզմանատանը տղամարդու դի են հայտնաբերել: Մարմինը քայքայված եւ կիսանեխած է եղել: Պարզվել է, որ մահացածը Երեւանի 54-ամյա բնակիչ Արթուր Շողունցն է: Դատաբժշկի նախնական եզրակացության համաձայն՝ տղամարդը շուրջ 5 օր առաջ է մահացել:
Հունիսի 20-ին դոլարի արժեզրկմանը միացել են նաեւ եվրոն ու ռուբլին: Արդյունքում դոլարի փոխարժեքն այսօր արդեն կազմել է 480 դրամ, եվրոյինը՝ 536, ռուբլունը՝ 8 դրամ 15 լումա, ֆունտինը՝ 610 դրամ:
Հունիսի 21-ին հանրապետության հյուսիսային շրջաններում տեղումներ են սպասվում: Օդի ջերմաստիճանը հունիսի 22-ին 5-6 աստիճանով կնվազի, հետո աստիճանաբար կբարձրանա: Երեւանում նույնպես հնարավոր է կարճատեւ անձրեւ եւ ամպրոպ: Մայրաքաղաքում գիշերը կդիտվի +19+21, ցերեկը՝ +32+34 աստիճան տաքություն: