7500 դրամ արժողությամբ «Պոբեդա» ավիաընկերության տոմսերը վաճառվում են հաշված րոպեների ընթացքում։ Այս մասին օգոստոսի 17-ին կառավարության նիստից հետո  լրագրողների հետ զրույցում հայտարարեց Քաղավիացիայի գլխավոր վարչության պետ Սերգեյ Ավետիսյանը։

Նրա խոսքով՝ ոչ միայն «Պոբեդա», այլեւ մյուս ավիաընկեությունների բոլոր էժան տոմսերը շատ արագ են վաճառվում։ «Ինչ վերաբերում է 7500 դրամ արժողությամբ «Պոբեդա»-ի ավիատոմսերին, նրանք վաճառվում են հաշված րոպեների ընթացքում։ Իսկ Գյումրիում ավիաընկերությունների տոմսերի բարձր արժեքը խոսում է այն մասին, որ «Շիրակ» օդանավակայնը շատ պահանջված է։ Ժամանակին դա կասկածի տակ էին դնում։ Կյանքը ցույց է տալիս, որ «Շիրակ» օդանավակայանում անցյալ տարի նույն ժամանակաշրջանում զրոյական չվերթների դեպքում այսօր արդեն մենք ունենք ամենօրյա չվերթներ։ Երեքշաբթի մենք 3 չվերթ ունեինք։ Այսպիսով, Գյումրիի «Շիրակ» օդանավակայանն առաջ է ընթանում»,-նշեց Սերգեյ Ավետիսյանը։