Ամառային արձակուրդն Արցախում անցկացնող Կարեն Կարապետյանն ակտիվ հանգստի մեջ է: Նա Արցախի վարչապետ Արայիկ Հարությունյանի ուղեկցությամբ այցելում է տարբեր շրջաններ, ուսումնասիրում տեղի բնակիչների խնդիրները՝ հիմնականում գյուղատնտեսության ոլորտում: Հայաստանի վարչապետն արդեն հասցրել է լինել Քարվաճառի, Ասկերանի, Մարտունու, Մարտակերտի շրջաններում, հետեւել է Թալիշի վերականգնման աշխատանքներին: Ավելի ուշ Մատաղիսում Կարեն Կարապետյանը Վլադիմիր Պուտինի ոճով եւ իրեն բնորոշ դրայվով սկուտեր է քշել ջրամբարում: Ժամանցին միացել է նաեւ Արցախի վարչապետ Արայիկ Հարությունյանը:
Չնայած արձակուրդին՝ Կարեն Կարապետյանը հետ չի մնում սոցցանցերի թոփ թեմաներից: «Խոսրովի անտառի» հրդեհը մարելուց հետո նա իր ֆեյսբուքյան էջում անդրադարձել է Կառավարությանն ուղղված քննադատություններին:
«Որեւէ երկիր ապահովագրված չէ արտակարգ իրավիճակներից եւ լինում են դեպքեր, երբ ամենահզոր պետություններն ի զորու չեն միայն սեփական ուժերով պայքարել բնական աղետի դեմ»,- գրել է վարչապետը՝ նշելով, որ այնուամենայնիվ, կատարվածից իրենք հետեւություններ կանեն:
«Խոսրովի անտառում» տեղի ունեցածի հետեւանքների եւ պատճառների վերաբերյալ այսօր ԱԻ փոխնախարար Դավիթ Կարապետյանը զեկուցել է Կառավարության նիստում, որը վարել է Վաչե Գաբրիելյանը: Փրկարարների գործողություններից հասարակության դժգոհությունը փոխնախարարը բացատրում է ոչ թե ԱԻՆ-ի անպատրաստ լինելով, այլ հասարակության չափից դուրս մեծ սպասումներով:
Ավելի ուշ արդեն լրագրողների հետ զրույցում Դավիթ Կարապետյանն անդրադարձել է վերջին օրերին շրջանառվող գլխավոր հարցին՝ ինչու Ռուսաստանից ավելի շուտ ինքնաթիռ չխնդրեցին։
Թեեւ ռուսական ինքնաթիռը 16 թռիչք իրականացրեց, մինչեւ մարվեցին արգելոցի հիմնական օջախները, ԱԻՆ-ում վստահեցնում են, որ ինքնաթիռի գործոնը պետք չէ գերագնահատել:
Եթե ռուսական ինքնաթիռի օգտակարությունը Կառավարությունը չի հերքում, ապա կրակը մարելու գիշերը Հանրապետությունում տեղացած անձրեւի կարեւորությունը, կարելի է ասել, ընդհանրապես չի ընդունում:
Մեռելոցների պատճառով աշխատանքային օրերը տեղափոխելու պրակտիկան թեեւ նվազել է, բայց ամբողջությամբ չի վերացել: Կառավարությունն այսօր որոշել է Խաչվերաց տոնին հաջորդող երկուշաբթիի՝ սեպտեմբերի 18-ի աշխատանքային օրը տեղափոխել շաբաթ օրը՝ սեպտեմբերի 23-ին:
Խոսրովի արգելոցում եւ Վայոց ձորում բռնկված հրդեհների պատճառով տեղի վայրի կենդանիները եւ թռչունները տեղափոխվել են հարակից անվտանգ շրջաններ: Բնապահպանության նախարարությունը բնակիչներին կոչ է անում զգույշ լինել, ինչպես նաեւ չվնասել աղետի պատճառով նոր թաքստոցներ փնտրող կենդանիներին: Որսորդներին նախարարությունը կոչ է անում զերծ մնալ այդ տարածքներում որս իրականացնելուց, նշելով, որ այդ շրջաններում ուժեղացված հսկողություն է սահմանվել:
Ահաբեկչություն՝ Իսպանիայում։ Օգոստոսի 17-ին Բարսելոնի կենտրոնում պիկապը մխրճվել է մարդկանց բազմության մեջ։ Առնվազն երեք մարդ է զոհվել։ Վարորդն այնուհետեւ թաքնվել է թուրքական ռեստորանում եւ ենթադրաբար պատանդներ վերցրել։ Ժամը 21։00-ի դրությամբ՝ վարորդին դեռ չէին վնասազերծել։
Դոլարը, եվրոն եւ ֆունտը էժանացել են, ռուբլին՝ աննշան թանկացել: Օգոստոսի 17-ին դոլարի փոխարժեքը կազմել է 478, եվրոյինը 559, ֆունտինը 615, ռուբլունը՝ 8.05 դրամ:
Վաղվանից սկսած օդի ջերմաստիճանը կրկին կբարձրանա 4-5 աստիճանով: Տեղումները կդադարեն, մայրաքաղաքում գիշերը կդիտվի մինչեւ 18, ցերեկը՝ մինչեւ 34 աստիճան տաքություն: