Արցախա-ադրբեջանական շփման գծում հակառակորդը կրկին ակտիվ է եղել: Հոկտեմբերի 24-ի կեսօրից հետո ադրբեջանական կողմը նորից խախտել է հրադադարը՝ նաեւ ականանետեր կիրառելով: Պաշտպանության բանակը տեղեկացնում է, որ հայկական կողմը կորուստներ չունի: Իսկ երեկոյան եւ գիշերվա ընթացքում իրադրությունը հանգիստ է եղել:
Հանգստյան օրերից ի վեր ադրբեջանական կողմը պարբերաբար խախտում է հրադադարի ռեժիմը: Չնայած Ժնեւում Սարգսյան-Ալիեւ հանդիպման արդյունքում ձեռք բերած համաձայնությանը՝ Բաքուն կիրակի եւ երկուշաբթի էլ շփման գծում ՍՊԱՅԿ տիպի հեռակառավարվող հրթիռներ է կիրառել: Սերժ Սարգսյանը տարակուսում է. ի՞նչն է այդքան զայրացրել ադրբեջանցի գործընկերոջը: Նախագահը նաեւ հավելել է. չի կարելի ե՛ւ կրակել, ե՛ւ բանակցել: Նշենք նաեւ, որ ԵԱՀԿ առաքելությունն այսօր դիտարկում է անցկացրել Արցախի եւ Ադրբեջանի զինված ուժերի շփման գծում՝ Հադրութի հարավ-արեւելյան ուղղությամբ: Դիտարկումը նորմալ է անցել:
Այսօր կայացել է Եվրասիական միջկառավարական խորհրդի նիստը՝ ԵՏՄ անդամ պետությունների վարչապետների մասնակցությամբ: Մինչ նիստի մեկնարկը նրանց ընդունել է Սերժ Սարգսյանը: Նախագահը կարեւորել է խորհրդի աշխատանքները, բայց եւ մի խնդիր մատնանշել:
Իսկ միջկառավարական խորհրդի նիստի ընթացքում որոշ երկրների ներկայացուցիչներ փոխադարձ մեղադրանքներ են հնչեցրել: Դմիտրի Մեդվեդեւը փոխանցել է շաքարի շուկայում տիրող իրավիճակի շուրջ Ռուսաստանի մտահոգությունը. այստեղ շուկայի կարգավորման միջոցների վերանայման անհրաժեշտություն են տեսնում: Մոսկվան դժգոհ է, որ ԵՏՄ անդամ Ղազախստանից եւ Բելառուսից ներմուծված էժան շաքարը հեղեղում է ռուսական շուկան՝ վնասելով տեղական արտադրողներին: Իսկ Ղազախստանը Ղրղզստանին մեղադրել է Չինաստանից ստվերային ներմուծման մեջ: Ղազախ վարչապետը պնդել է, որ Ղրղզստանը չի ապահովում ապրանքների ներմուծման մաքսային պատշաճ կարգը:
Նիստի ընթացքում քննարկվել է նաեւ առեւտրի ոլորտում ազգային խոչընդոտների վերացման հարցը: Ապրանքների ազատ տեղաշարժի սահմանափակումները վերացնելու համար երկամյա ծրագիր է մշակվում: ԵՏՄ անդամ պետությունները նաեւ վարորդական իրավունքի տրամադրման միասնական կանոնների մասին համաձայնագիր են մշակելու։
Իրաքյան Քուրդիստանի իշխանությունները հայտարարել են, թե պատրաստ են «սառեցնել» շրջանի անկախության հռչակումը: Նրանք Բաղդադին առաջարկել են հրադադար հաստատել եւ երկխոսություն սկսել: Էրբիլը նշել է նաեւ, որ Իրաքի զորքերի եւ քրդական զինված կազմավորումների միջեւ հոկտեմբերի 16-ից սկսված դիմակայությունը «երկու կողմին էլ վնաս է հասցրել եւ կարող է հանգեցնել չընդհատվող արյունահեղության»: Սեպտեմբերի 25-ին Իրաքի քրդական ինքնավարությունը ձայների մեծամասնությամբ քվեարկել էր Իրաքից անջատվելու օգտին: Բաղդադն առաջարկել էր չեղարկել հանրաքվեի արդյունքները, իսկ մերժում ստանալուց հետո ռազմական գործողություն սկսել՝ քրդերից գրավելով նավթով հարուստ Քիրքուք քաղաքն ու այլ շրջաններ: Իրաքի վարչապետն առայժմ չի արձագանքել հրադադարի եւ երկխոսության առաջարկին:
Արմեն Ջիգարխանյանը դուրս է գրվել հիվանդանոցից: Դերասանն այնտեղ շուրջ երկու շաբաթ անցկացրեց: Այսօր հայտնի է դարձել նաեւ, որ 86-ամյա Ջիգարխանյանը երիտասարդ կնոջից՝ Վիտալինա Ցիմբալյուկ-Ռոմանովսկայայից բաժանվելու դիմում է ներկայացրել: Նա հայտարարել է, որ կինը կողոպտել է իրեն, իսկ հետո ցանկացել է սպանել: Մոսկվայի հաշտարար դատարանների տեղեկատվական կենտրոնը հաղորդել է, որ դերասանը խնդրել է ապահարզանի հարցով նիստը դռնփակ անցկացնել: Նա չի ցանկացել, որ ունեցվածքը բաժանելու հարցը հրապարակային քննվի:
Մինչ այդ, ռուսական մամուլը գրում է, որ Մոսկվայի դրամատիկական թատրոնը «ռեյդով գրավել են»: Ջիգարխանյանի կնոջ ներկայացուցիչը հայտնել է, թե թատրոնը գրավել է «հայկական խմբավորում». թատրոնի ղեկավարությունը հեռացվել է, հաշվապահությունը՝ գրավվել, իսկ Ջիգարխանյանը փակված է իր աշխատասենյակում: Ի դեպ՝ դերասանի կինն իր ցանկությամբ արդեն ազատվել է թատրոնի տնօրենի պաշտոնից: Այն ժամանակավորապես կգլխավորի փոխտնօրեն Ելենա Գիլվանովան:
Դոլարի վերելքը կանգ առավ, հիմա էլ եվրոն է թանկանում: Հոկտեմբերի 25-ին դոլարի փոխարժեքը կազմել է 482 դրամ, եվրոյինը՝ 567, ռուբլունը՝ 8 դրամ 38 լումա, ֆունտինը՝ 637 դրամ:
Հոկտեմբերի 26-27-ը հանրապետությունում սպասվում է առանց տեղումների եղանակ: Օդի ջերմաստիճանը 1-2 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +7+9, ցերեկը՝ +23+25 աստիճան տաքություն: