Նախագահ Սերժ Սարգսյանը հարցազրույց է տվել ռուսական «ՌԻԱ Նովոստի»-ին եւ անդրադարձել սպառազինությունների մատակարարման համար Ռուսաստանից սպասվող հերթական վարկի մասին: 2015 թվականի հունիսին կնքված համաձայնագրով 200 մլն դոլարի վարկի շրջանակում ռուսական արտադրության ռազմական արտադրանքի մատակարարումները շարունակվում են: Արդեն ստորագրված նոր՝ 100 մլն դոլարի պայմանագիրն էլ կիրականացվի բոլոր միջպետական համաձայնեցումներն ավարտելուց հետո: Նշենք, որ վարկը հատկացվում է 15 տարի մարման ժամկետով: Հայաստանը կարող է վարկային միջոցներից օգտվել 2018-2022 թվականներին: Հարցազրույցում Սերժ Սարգսյանը խոսել է նաեւ ռուսական ձեռնարկությունների հետ արդյունաբերական կոոպերացիա զարգացնելու պատրաստակամության, ժամանակակից մրցունակ արտադրանք թողարկելու հնարավորության մասին:
Անդրադառնալով հայկական ատոմակայանի փակման մասին լուրերին, նախագահը եւս մեկ անգամ կրկնել է, որ այդ մասին որեւէ կետ Եվրամիության հետ ստորագրվելիք համաձայնագրում չկա: Սերժ Սարգսյանի խոսքով՝ դրանք արհեստական քննարկումներ եւ իրականության հետ կապ չունեցող լուրեր են:
Ազգային ժողովում այսօր քննարկել են 2018 թվականի պետբյուջեով նախատեսված իշխանության պետական եւ դատական մարմինների, մարդու իրավունքների պաշտպանի աշխատակազմի համար նախատեսված եկամուտների եւ ծախսերի դրույթները: Բյուջեի նախագծի համաձայն՝ 2018 թվականին Հայաստանի նախագահի աշխատակազմը գրեթե կրկնակի կկրճատվի: Կնվազեն նաեւ աշխատակազմի ծախսերը՝ 4.88 մլրդ դրամից մինչեւ շուրջ 2.5 մլրդ դրամ: Կրճատումները պայմանավորված են Սահմանադրական փոփոխությունների արդյունքում նոր նախագահի լիազորությունների կրճատմամբ: Արմեն Գեւորգյանը նշել է, որ նախագահի աշխատակազմում հաջորդ տարվանից առավելագույնը 200 աշխատակից կլինի: Լուրեր են շրջանառվում, որ Մարդու իրավունքների պաշտպանի լիազորությունները կրճատվելու են, ավելին, նաեւ փոխվելու է պաշտպանը: Լրագրողների հարցին Արման Թաթոյանը պատասխանել է, որ անհեթեթ լուրեր են:
«Սասնա ծռեր» խմբի 10 անդամի գործը վարող դատավոր Մեսրոպ Մակյանին հաջողվել է առաջին իսկ նիստում անցկացնել նախապատրաստական փուլի մեծ մասը: Դատավարության մասնակիցների համար հենց սկզբից պարզ էր. Մակյանն այլ տակտիկա է ընտրել: Եթե Արտուշ Գաբրիելյանն ամբաստանյալներին նիստերի դահլիճից հեռացնում էր չկանգնելու համար, Մեսրոպ Մակյանը դրա վրա, այսպես ասած, «աչք էր փակում»: 3 ժամ տեւած դատական նիստում Մակյանը հասցրել է ճշտել ամբաստանյալների ինքնությունը, հետաքրքրվել՝ արդյո՞ք դատավորին ինքնաբացարկ հայտնելու միջնորդություններ կան, վերացրել է ամբաստանյալներից շատերի համար սահմանված տեսակցությունների արգելքը:
Հետաքրքիր է, որ Մեսրոպ Մակյանը «Սասնա ծռերի» անդամներին թույլ է տվել խոսել՝ ինչի մասին եւ ինչպես ուզում են: Պավլիկ Մանուկյանն անեկդոտ է պատմել, Վարուժան Ավետիսյանը դատարանն անվանել է իշխանությունների հաշվեհարդարի գործիք: Արայիկ Խանդոյանի հայտարարությունը, սակայն, կիսատ է մնացել. մեղադրող Պետրոս Պետրոսյանը միջնորդել է՝ թույլ չտալ շարունակել խոսքը. Խանդոյանը հեգնանքով է արձագանքել: Մեսրոպ Մակյանը պարբերաբար Խանդոյանին հորդորել է ըստ էության խոսել, բայց ապարդյուն: Իրավիճակը հանդարտեցնելու համար դատավորն ընդմիջում է հայտարարել: Նշենք, որ այսօրվա նիստում որոշում է կայացվել այս գործով նիստերն անցկացնել շաբաթական երկու օր: Ստացվում է, որ «Սասնա ծռերի» 3 գործերով շաբաթական 4 օր նիստ տեղի կունենա, բոլորն էլ արտագնա:
Նյու Յորքի կենտրոնում ողբերգական միջադեպ է տեղի ունեցել, որն ահաբեկչություն են համարում: Բեռնատարը հեծանիվների երթեւեկության համար նախատեսված հատվածում հարվածել է հեծանվորդներին, հետո մխրճվել դպրոցական ավտոբուսի մեջ: Այնուհետեւ վարորդը դուրս է եկել մեքենայից ու կրակ բացել անցորդների ուղղությամբ: Պատահարի հետեւանքով 7 մարդ է զոհվել, հաղորդվում է 15 վիրավորի մասին:
Իրավապահները հաղորդել են, որ ահաբեկիչը ձերբակալված է: Ըստ տեղեկությունների՝ նա Ֆլորիդայի Տամպա քաղաքից է, անունը՝ Սեյֆուլո Սաիպով: Լրատվամիջոցների տվյալներով՝ ձերբակալվածը 29 տարեկան է, ազգությամբ ուզբեկ: Կասկածյալը Uber տաքսի ծառայությունում վարորդ է աշխատել, սակայն կարճ ժամանակ անց նրան արգելափակել են ծառայության հավելվածում:
Կատարվածից հետո Դոնալդ Թրամփը կարգադրել է խստացնել ԱՄՆ ժամանող փախստականների ընտրության ծրագիրը, ինչպես նաեւ ավելի մանրակրկիտ ստուգել Միացյալ Նահանգներ ժամանող օտարերկրացիներին:
Երկարատեւ հիվանդությունից հետո վախճանվել է Ստանիսլավսկու անվան ռուսական դրամատիկական թատրոնի գեղարվեստական ղեկավար Ալեքսանդր Գրիգորյանը: Ժողովրդական արտիստն 81 տարեկան էր: Ալեքսանդր Գրիգորյանը ծնունդով Բաքվից էր, մասնագիտական կրթությունը ստացել է Լենինգրադում: Նա ավելի քան 150 ներկայացում է բեմադրել Հայաստանում, Ռուսաստանում, Բուլղարիայում, Լեհաստանում, Հունգարիայում եւ այլուր: Ալեքսանդր Գրիգորյանի հոգեհանգստի եւ վերջին հրաժեշտի արարողությունը տեղի կունենա Ստանիսլավսկու անվան թատրոնում: Նրան հողին կհանձնեն նոյեմբերի 4-ին Երեւանի քաղաքային պանթեոնում:
Նոյեմբերի 1-ին դոլարն ու եվրոն շարունակել են ամրապնդել դիրքերը: Դոլարի փոխարժեքն արդյունքում կազմել է 483 դրամ, եվրոյինը՝ 562, ռուբլունը՝ 8 դրամ 30 լումա, ֆունտինը՝ 642 դրամ:
Նոյեմբերի 2-ի գիշերը Վայոց ձորում, Սյունիքում եւ Արցախում տեղումներ են սպասվում: Օդի ջերմաստիճանը 2-4 աստիճանով կնվազի: Երեւանում նոյեմբերի 2-5-ը տեղումներ չեն սպասվում: Մայրաքաղաքում գիշերը կդիտվի +2+4, ցերեկը՝ +14+16 աստիճան տաքություն: