Ռուսաստանի Կեմերովո քաղաքի առեւտրի կենտրոնում բռնկված խոշոր հրդեհի հետեւանքով 64 մարդ է զոհվել, մի քանի տասնյակ մարդ անհետ կորած է համարվում: «Զիմնյայա Վիշնյա» առեւտրի կենտրոնում հրդեհը բռնկվել է կիրակի:
Մասնագետներն արդեն ուսումնասիրում են ողբեգրության հնարավոր պատճառները: Վարկածներից մեկի համաձայն՝ հրդեհի պատճառ կարող էին դառնալ շենքում էլեկտրամոնտաժման եւ էլեկտրացանցի սպասարկման ժամանակ թույլ տրված խախտումները: Շրջանառվող վարկածներից մեկի համաձայն էլ՝ կրակը կարող էր բռնկվել մանկական ատրակցիոնում էլեկտրահաղորդման լարերի կարճ միացման հետեւանքով:
Ականատեսները պատմել են, որ հրդեհի ազդանշան չի հնչել, մարդկանց տարհանում չի կազմակերպվել: Արդյունքում առեւտրի կենտրոնում գտնվողները խուճապի են մատնվել, հրմշտոց է առաջացել: Ոմանք շենքից դուրս պրծնելու համար պատուհաններից են նետվել: Ողբերգության փաստով քրեական գործ է հարուցվել, 4 մարդ կալանավորվել է: Հավելենք, որ Ռուսաստանի ԱԻՆ նախնական տվյալներով՝ առեւտրի կենտրոնում հրդեհի հետեւանքով տուծածների եւ զոհերի թվում Հայաստանի քաղաքացիներ կամ ազգությամբ հայեր չկան:
Արցախի զորամասերից մեկի պահպանության տեղամասում դժբախտ դեպք է տեղի ունեցել. ուժեղ քամու հետեւանքով ծառի տապալման արդյունքում ժամկետային զինծառայող է մահացել՝ 19-ամյա Արմեն Հարությունյանը: Զինծառայողը Երեւանի բնակիչ էր, բանակ էր զորակոչվել հունվարին: Նա Հարությունյանների ընտանիքի երկրորդ զավակն էր: Զինծառայողի դին Երեւան են տեղափոխել: Դատաբժշկական փորձաքննություն է նշանակվել:
Մարտի 24-25-ին հանրապետությունում գրանցված ուժեղ քամիները ավերածություններ են առաջացրել մի շարք շրջաններում: Վանաձորում քամին վնասել է բնակելի տների ու շենքերի տանիքները, քշել է նաեւ քաղաքի կարի արտադրամասի տանիքը: Հանրապետության որոշ հատվածներում քամու արագությունը հասել է մինչեւ 35 մ/վ-ի: Շենքերի տանիքներ են վնասվել նաեւ Տավուշում, Շիրակում եւ Գեղարքունիքում: Սպիտակում ծառը մեքենայի վրա է ընկել, Գուգարք գյուղն էլ ուժեղ քամու հետեւանքով մի քանի ժամ հոսանքազրկվել է: Այս ամենի հետեւանքով զոհեր, բարեբախտաբար, չկան:
Սահմանադրության փոփոխություններից հետո պարզ էր, որ Հայաստանի վարչապետի թեկնածու առաջադրելու հնարավորություն կունենա խորհրդարանական մեծամասնությունը, այս դեպքում՝ ՀՀԿ-ՀՅԴ կոալիցիան: Խորհրդարանական ճեպազրույցների ընթացքում այս մասին հայտարարել է Դաշնակցությունից Աղվան Վարդանյանը՝ հավելելով, որ փողոցային պայքարի կարիք, որի մասին հայտարարում են ընդդիմության ներկայացուցիչները, չի տեսնում, նաեւ դրա ռեսուրսը չկա:
Անդրադառնալով Նիկոլ Փաշինյանի հայտարարությանը, թե ապրիլի 9-ից, երբ ավարտվում է գործող նախագահի լիազորությունների ժամկետը, մինչեւ ապրիլի 17-ը, երբ խորհրդարանը երկրի վարչապետ է ընտրելու, իշխանությունը փողոցում նետված է լինելու, պետք է գնալ ու վերցնել այն, դաշնակցական գործիչը հեգնել է. իսկ ո՞ր փողոցում: Փաշինյանի հայտարարությանը հումորով է վերաբերվում նաեւ հանրապետական խմբակցության ղեկավարը:
Ինչ վերաբերում է վարչապետի թեկնածուին. «Ելք»-ից Գեւորգ Գորգիսյանը կարծում է, որ այդ պաշտոնը ստանձնած ցանկացած անձ, իր բնորոշմամբ, անկառավարելի դեւ է լինելու, քանի որ հակակշիռ չի լինելու:
Եվրամիության անդամ 28 պետություններից 14-ը որոշել են արտաքսել ռուս դիվանագետներին՝ ի նշան «Սկրիպալի գործով» Լոնդոնի հետ համերաշխության: Դոնալդ Տուսկը չի մանրամասնել այդ երկրների անունները, ինչպես նաեւ չի հայտնել արտաքսվող դիվանագետների թիվը: Սակայն նման որոշման մասին հայտնել են Գերմանիան, Ֆրանսիան, Լեհաստանը, Չեխիան: Միացյալ Նահանգներն իր հերթին հայտարարել է ռուսական հետախուզության տասնյակ սպաների արտաքսելու եւ Սիեթլում Ռուսաստանի գլխավոր հյուպատոսությունը փակելու որոշման մասին: Այս երկրներին միացել է նաեւ Ուկրաինան. Կիեւը հայտարարել է, որ երկրից արտաքսելու է ռուսաստանցի 13 դիվանագետի:
Մոսկվան էլ հայտնել է Ռուսաստանից ամերիկյան 60 դիվանագետի արտաքսելու մտադրության մասին՝ ի պատասխան ԱՄՆ-ից նույնքան ռուս դիվանագետների արտաքսման: Այստեղ նաեւ հայտարարել են, որ պատասխան գործողությունները հայելային կլինեն, նույնը կլինի նաեւ արտաքսվող դիվանագետների թիվը: Հիշեցնենք, որ ռուս նախկին լրտես Սերգեյ Սկրիպալը եւ նրա դուստրը թունավորվել են մարտի 4-ին, անգլիական Սոլսբերի քաղաքի առեւտրի կենտրոններից մեկում: Նրանք ծայրահեղ ծանր վիճակում հիվանդանոցում են: Սկրիպալներին թունավորելու համար Մեծ Բրիտանիան Ռուսաստանին է մեղադրում:
Վորոնեժում մարտի 20-ին հայկական ավտոբուսի մասնակցությամբ վթարի հետեւանքով տուժածներից 49-ամյա Դավիթ Սարդարյանն այսօր մահացել է: Նա Պավլովսկի հիվանդանոցում էր, վիճակը ծայրահեղ ծանր էր գնահատվում: Հիշեցնենք, որ մարտի 20-ին Երեւան-Մոսկվա երթուղին իրականացնող հայկական համարանիշերով Mercedes մակնիշի ավտոբուսը դուրս էր եկել ճանապարհի հանդիպակաց գոտի եւ բախվել մի բեռնատարի: Պատահարի հետեւանքով 2 մարդ զոհվել է, 8 տուժած տարբեր աստիճանի վնասվածքներով տեղափոխվել Պավլովսկի հիվանդանոց: Զոհվել էին ավտոբուսի ուղեւորներից Արտակ Սուքիասյանը եւ բեռնատարի վարորդը: Վթարի ենթարկված ավտոբուսը պատկանում է Երեւանում գրանցված «ՄԱՆ-ՏՈՒՐ» ընկերությանը:
Յուրա Մովսիսյանը շվեդական ակումբ է տեղափոխվել: Ֆուտբոլի Հայաստանի հավաքականի նախկին հարձակվողը 6 ամսվա պայմանագիր է կնքել «Յուրգորդենի» հետ, որը երկարաձգելու հնարավորություն ունի: Նշենք, որ Շվեդիայի առաջնությունում «Յուրգորդենը» 3-րդ տեղն է գրավել եւ Եվրոպայի լիգայի որակավորման փուլի ուղեգիր նվաճել: Յուրա Մովսիսյանը 2016 թվականից խաղում էր ամերիկյան «Ռեալ Սոլթ Լեյք» ակումբում, իսկ մինչ այդ հանդես է եկել նաեւ ամերիկյան «Կանզաս Սիթիում», դանիական «Ռանդերսում», ռուսական «Կրասնոդարում» եւ «Սպարտակում»: Ֆուտբոլիստը հույս է հայտնել, որ կկարողանա օգտակար լինել շվեդական թիմին տիտղոսներ նվաճելու հարցում:
Խոսելով Հայաստանի ազգային հավաքականում անցկացրած տարիների մասին՝ 30-ամյա ֆուտբոլիստը նշել է, որ դա մեծ փորձ էր իր համար: Յուրա Մովսիսյանը 2010-2015 թվականներին Հայաստանի հավաքականի կազմում 35 հանդիպում է անցկացրել՝ դառնալով 10 գոլի հեղինակ: Հայաստանի ֆուտբոլի ֆեդերացիայի նախագահի որոշմամբ՝ վերջին շրջանում նա հավաքական չի հրավիրվում:
Մարտի 26-ին դոլարը, եվրոն եւ ֆունտը թանկացել են: Դոլարի փոխարժեքը կազմել է 480 դրամ, եվրոյինը՝ 596, ռուբլունը՝ 8 դրամ 44 լումա, ֆունտինը՝ 683 դրամ:
Մարտի 27-ին հանրապետությունում սպասվում է առանց տեղումների եղանակ: Օդի ջերմաստիճանը 27-28-ին 3-4 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +8+10, ցերեկը՝ +21+23 աստիճան տաքություն:
