Նիկոլ Փաշինյանը վստահեցնում է, որ իր քայլարշավն ընդդիմության համար պաշտոններ ապահովելու նպատակ չի հետապնդում: Այսպիսով Փաշինյանը կրկին անդրադարձել է «Ելք» դաշինքից իր գործընկեր Էդմոն Մարուքյանի հոդվածին, որը տարատեսակ մեկնաբանություններ է ծնել: Հոդվածում Մարուքյանը ենթադրություն էր հայտնել, որ «Ծառուկյան» դաշինքը շուտով կարող է իշխանության մաս կազմել, եւ ընդդիմության «մենաշնորհը» կմնա «Ելք»-ին: Այդ դեպքում, ըստ Մարուքյանի, իշխանությունը պետք է «Ելք»-ին մի շարք պաշտոններ տա՝ որպես իշխանությունների վերահսկման այլընտրանք: Նիկոլ Փաշինյանն էլ արձագանքել էր՝ գործընկերոջը կոչ անելով զերծ մնալ նման հայտարարություններից:
Մարուքյանի հոդվածին այսօր անդրադարձել է նաեւ ՀՀԿ-ն. Վահրամ Բաղդասարյանն ընդդիմադիր դաշինքին առաջարկել է պաշտոնների համար գրավոր դիմել, իրենք էլ կմտածեն: Կարեւորը, նրա խոսքով, պատասխանատվություն ստանձնելն է: Իսկ «Ելք»-ում խոստովանում են, որ տարաձայնություններ եւ խնդիրներ կան, սակայն Գեւորգ Գորգիսյանը դա ժողովրդավարության դրսեւորում է համարում: Նա նաեւ հույս ունի, որ կկարողանան լրացուցիչ աշխատանք տանել եւ թույլ չտալ, որ դաշինքը պառակտվի:
Աբովյանի ծննդատանը լույս աշխարհ եկած նորածինը երեւանյան հիվանդանոցներից մեկում մահացել է: Հարազատները պնդում են, որ երեխան մահացել է բժշկի կողմից մասնագիտական պարտականությունները ոչ պատշաճ կատարելու հետեւանքով: «Սուրբ Աստվածամայր» բուժկենտրոնի տնօրենը, որտեղ մահացել է փոքրիկը, նշում է, որ կինը ծանր ծննդաբերություն է ունեցել՝ ընկերքի շերտազատումով:
Նիկոլայ Դալլաքյանի տեղեկացմամբ՝ ծննդաբերությունից 20 օր առաջ կնոջ մոտ արյունահոսություն է սկսվել, բուժում է ստացել: Սակայն հետագայում արյունահոսությունը վերսկսվել է, եւ մասնագետները որոշել են կեսարյան հատում անել: Բժիշկները կարողացել են փրկել մոր կյանքը, հետո վերակենդանացրել են երեխային ու Երեւան տեղափոխել: Մասնագետը պնդում է, որ փոքրիկը ծանր վիճակում է եղել. անհաս՝ 1700 գրամ քաշով, թոքային լուրջ խնդիրներով ու այլ հիվանդություններով: Ցավոք, նորածնի կյանքը փրկել չի հաջողվել: Ծնողները դիմել են իրավապահ մարմիններին և դին ուղարկվել է դատաբժշկական փորձաքննության:
Ռուսաստանի առեւտրի կենտրոններում, կարծես, հակահրդեհային անվտանգության հետ կապված լուրջ խնդիրներ կան: Այսօր հրդեհ է բռնկվել Մոսկվայի «Պերսեյ» առեւտրի կենտրոնում: Շուրջ 300 մարդ տարհանվել է: Տուժածներից մեկը հիվանդանոց տեղափոխվելու ճանապարհին մահացել է: Հրդեհին բարդության երկրորդ աստիճան է տրվել: Հրշեջներին հաջողվել է մարել կրակի աղբյուրը: Պատահարի հանգամանքները պարզվում են: Հիշեցնենք, որ անցյալ շաբաթ էլ հրդեհ էր բռնկվել Կեմերովոյի «Զիմնյայա վիշնյա» առեւտրի կենտրոնում: Խոշոր հրդեհի հետեւանքով 64 մարդ զոհվեց, այդ թվում՝ 41 երեխա: Այս պատահարից հետո ռուսական իշխանությունները խոստացել էին խստացնել առեւտրի կենտրոններում հակահրդեհային ստուգումները:
Չինաստանը պատասխան միջոցներ է կիրառում ԱՄՆ-ի դեմ: Պեկինն Առեւտրի համաշխարհային կազմակերպությանը (ԱՀԿ) տեղեկացրել է Միացյալ Նահանգներից ներկրվող 128 անուն ապրանքների համար մաքսատուրքերի կիրառման մասին: Սա պատասխանն է պողպատի եւ ալյումինի համար Վաշինգտոնի կողմից սահմանված սակագների:
Մարտի վերջին ԱՄՆ նախագահը «Չինաստանի տնտեսական ագրեսիայի դեմ պայքարի մասին» հուշագիր էր ստորագրել, որով թույլատրվում էր սահմանափակումներ կիրառել Չինաստանից ներմուծվող արտադրանքի նկատմամբ: Դոնալդ Թրամփը Պեկինին մեղադրում է ամերիկյան մտավոր սեփականության գողության եւ անազնիվ առեւտրային քաղաքականություն վարելու համար. Չինաստանը հերքում է այս մեղադրանքները: Թրամփը նաեւ վստահեցնում է, որ ԱՄՆ-ն առեւտրային պատերազմ չի մղում Չինաստանի դեմ, պարզապես ցանկանում է վերականգնել «ոչ կոմպետենտ» մարդկանց պատճառով հասցված վնասները: Թրամփը նաեւ հաշվարկել է. ԱՄՆ-ն 500 մլրդ դոլարի առեւտրային դեֆիցիտ ունի, եւս 300 մլրդ դոլարի վնաս է կրում՝ մտավոր սեփականության գողության պատճառով:
Հայաստան ցուրտ մթնոլորտային հոսանքներ են ներխուժում. գիշերը մի քանի մարզերում ցրտահարության վտանգ կա: Ապրիլի 4-ի լույս 5-ի գիշերը՝ ժամը 04:00-07:00-ն ընկած ժամանակահատվածում, Արարատում, Արմավիրում եւ Տավուշում, ինչպես նաեւ Արագածոտնի եւ Վայոց Ձորի նախալեռնային գոտիներում հողի մակերեւույթին կանխատեսվում է -2-3 աստիճան: ԱԻՆ-ը հատկապես ջերմոցային տնտեսություններին խորհուրդ է տալիս փակել ջերմոցները, իսկ սածիլված դաշտերը, հնարավորության դեպքում, նշված ժամերին ոռոգել:
Ապրիլի 4-ին դոլարը փոքր-ինչ թանկացել է, եվրոն՝ ավելի քան 1 դրամով էժանացել: Դոլարի փոխարժեքը կազմել է 480 դրամ, եվրոյինը՝ 589, ռուբլունը՝ 8 դրամ 30 լումա, ֆունտինը՝ 674 դրամ:
Ապրիլի 5-ին հանրապետությունում սպասվում է առանց տեղումների եղանակ: Օդի ջերմաստիճանը գիշերը 3-4 աստիճանով կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի 0+2, ցերեկը՝ +14+16 աստիճան տաքություն:
