ԱՄՆ-ի եւ Սիրիայի գլխավորած կոալիցիայի հիմնական նպատակը ոչ թե «Իսլամական պետության» դեմ պայքարն է, այլ՝ ռազմական եւ տնտեսական ներկայության ամրապնդումը տարածաշրջանում: Այս մասին Պեկինում Շանհայի համագործակցության կազմակերպության անդամ պետությունների պաշտպանության նախարարների հանդիպման ժամանակ հայտարարել է ՌԴ պաշտպանության նախարար Սերգեյ Շոյգուն, փոխանցում է «ՏԱՍՍ»-ը:
«ԱՄՆ-ն եւ նրա դաշնակիցները իրենց նպատակներին հասնելու համար օգտագործում են միջազգային ահաբեկչության եւ ծայրահեղականության ուժերը: Որպես օրինակ նշեմ Իրաքը եւ Սիրիան: Երկար ժամանակ ԱՄՆ-ի կողմից ղեկվարվող ավելի քան 30 ռազմական առումով առաջատար պետությունների ամենահզոր կոալիցիոն խմբավորումը չկարողացավ հաղթել մարտիկներին, իսկ «ԻՊ»-ի կողմից վերահսկվող տարածքները ընդլայնվում էին»,- ասել է Շոյգուն:
«Ըստ երեւույթին, նպատակն այլ էր՝ խաթարել իրավիճակը տարածաշրջանում, ամրապնդել այնտեղ ռազմական եւ տնտեսական ներկայությունը»: «Իրավիճակը բարդանում է նաեւ նրանով, որ ահաբեկիչները ժամանակակից զենքեր են օգտագործում, այդ թվում նաեւ` հարվածային անօդաչու սարքեր»,- նշել է նախարարը:
Նրա խոսքով՝ Սիրիայում զինյալների կողմից օգտագործվող անօդաչուները կարող են գործել ավելի քան 100 կմ հեռավորության վրա: «Դրանց ստեղծումն անհնար է առանց զարգացած երկրների տեխնիկական աջակցության: Ոչնչացման նման միջոցների օգտագործումը խիտ բնակեցված վայրերում կարող է աղետալի հետեւանքներ ունենալ»,- ավելացրել է Շոյգուն:
