ԱԺ «Ելք» խմբակցության պատգամավոր, «Իմ քայլը» նախաձեռնության առաջնորդ Նիկոլ Փաշինյանը վստահեցրել է, որ իր վարչապետ դառնալուց հետո կադրային ջարդ չի լինի: «Մենք չենք պատրաստվում կադրային ջարդ իրականացնել»,- ապրիլի 27-ին, , «Մարիոթ» հյուրանոցում կայացած ասուլիսի ժամանակ ասել է Փաշինյանը:
Նրա խոսքով՝ այսօր եւս կառավարությունում կան ներդրում ունեցած մարդիկ: Որպես օրինակ՝ Փաշինյանը նշել է, որ լավ շինարարներ են նրանք, ովքեր կառուցում են այն, ինչ հանձնարարված է. հանձնարարված է կառուցել բանտ՝ կառուցում են բանտ, հանձնարարում են կառուցել պալատ՝ կառուցում են պալատ:
«Մենք չենք պատրաստվում վենդետա իրականացնել: Սա մեր գաղափարախոսությունը չէ: Եթե ցանկանայինք, կանեինք դա ավելի վաղ: Ի՞նչն է մեզ խանգարում: Միայն մեր գաղափարախոսությունը եւ մեր պատկերացումը Հայաստանի մասին: Ես տասնյակ անգամներ ասել եմ՝ ատելության էջը փակված է եւ չի բացվելու»,- վստահեցրել է Նիկոլ Փաշինյանը:
Պատասխանելով քաբանտարկյղալների մասին հարցին՝ Փաշինյանը նշել է, որ բոլոր քաղբանտարկյալները պետք է ազատ արձակվեն: Իսկ թե ովքեր են նշված քաղբանտարկյալների թվում, Փաշինյանն ասաց, որ այդ հարցի լուծումը պետք է վերապահել մասնագիտացված հասարակական կազմակերպություններին: Հարցին՝ արդյոք դրանց մեջ են նաեւ «Սասնա ծռեր» խմբի անդամնե՞րը, Նիկոլ Փաշինյանը նախընտրել է չպատասխանել:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել:
Արդեն երեկ՝ ապրիլի 26-ին, Փաշինյանը Կարեն Կարապետյանին կրկին հրավիրել էր ապրիլի 27-ին, ժամը 12-ին «Արմենիա Մարիոթ» հյուրանոցում՝ սկսելու բանակցությունների երկրորդ փուլը:
Վարչապետի պաշտոնակատար Կարեն Կարապետյանի մամուլի խոսնակ Արամ Արարատյաննն այսօր հայտարարել է, որ Կարեն Կարապետյանն անհեռանկարային է համարում Նիկոլ Փաշինյանի հետ «բանակցությունները»՝ մերժելով հանդիպումը:
