Բանակցությունները պետք է լինեն առանց լրատվամիջոցների, ազատ խոսակցության արդյունքում, ինչպես բանակցեցին Նիկոլ Փաշինյանն ու Գագիկ Ծառուկյանը: Այս մասին, այսօր՝ ապրիլի 27-ին, ԱԺ-ում լրագրողներին հայտնել է ՀՀԿ խմբակցության ղեկավար Վահրամ Բաղդասարյանը:
Նա հիշեցրել է, որ իրենք ՀՀ նախագահին կոչ են արել, որպեսզի քաղաքական կոնսուլտացիաներ կազմակերպի. «Մենք բաց ենք բանակցությունների համար եւ ցանկացած օրակարգային հարց պատրաստ ենք քննարկել: Բայց մենք ուլիտմատումների, պարտադրանքների չենք գնալու եւ նման բանակցություն անվանված ֆորմատով չենք գնալու»:
Դիտարկմանը, որ Նիկոլ Փաշինյանը հորդորել է ժողովրդին մայիսի 1-ին (ԱԺ-ում այդ օրն է տեղի ունենալու վարչապետի ընտրությունը-խմբ) հեղեղել Երեւանի փողոցները, փակել ԱԺ-ն, Բաղդասարյանն արձագանքեց. «Մենք գնալու ենք սահմանադրական ճանապարհով, եթե դա է իր սահմանադրական ճանապարհը թող իքը այդպես վարվի»:
Հարցին, թե դա չի՞ տանի բախումների, նա նշեց. «Եթե մտավախություն չունենայինք, վաղուց գնացած կլինեինք բախումների: Մեր ամբողջ մտավախությունն ու նպատակը դա է, որ բախումներ չլինեն: Բանակցությունները հայտարարված են, երբ քաղաքական ուժերը կտան իրենց համաձայնությունը, մենք պատրաստ ենք բանակցությունների»:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել:
Արդեն երեկ՝ ապրիլի 26-ին, Փաշինյանը Կարեն Կարապետյանին կրկին հրավիրել էր ապրիլի 27-ին, ժամը 12-ին «Արմենիա Մարիոթ» հյուրանոցում՝ սկսելու բանակցությունների երկրորդ փուլը՝ լրատվամիջոցների ներկայությամբ:
Վարչապետի պաշտոնակատար Կարեն Կարապետյանի մամուլի խոսնակ Արամ Արարատյաննն այսօր հայտարարել է, որ Կարեն Կարապետյանն անհեռանկարային է համարում Նիկոլ Փաշինյանի հետ «բանակցությունները»՝ մերժելով հանդիպումը:
«Փաշինյանի հրավերը նախորդից պրակտիկորեն չի տարբերվում». Փաշինյան- Կարապետյան հանդիպումը չի կայանա
