Հանրապետական կուսակցությունը վարչապետի թեկնածու չի առաջադրի: ՀՀԿ խոսնակ Էդուարդ Շարմազանովը լրագրողների հետ ճեպազրույցում հայտարարել է, որ իրենց համար առաջնայինը պետության ու հայրենիքի շահն է, Հայաստանի եւ Արցախի անվտանգությունը եւ ներքին կայունությունը: ՀՀԿ խմբակցությունը, սակայն, դեռ չի որոշել, թե ում թեկնածությունը կպաշտպանի: Շարմազանովը նաեւ բացատրել է թեկնածու չառաջադրելու որոշման պատճառը:
ՀՀԿ խոսնակը նշել է, թե կուսակցական կարգապահությունը ենթադրում է, որ խմբակցության պատգամավորները միասնական պետք է լինեն, միաժամանակ, սակայն, պատգամավորները կաշկանդված չեն իրենց մանդատով եւ կարող են քվեարկել իրենց խղճին համապատասխան:
Իսկ ՀՀԿ-ի կոալիցիոն նախկին գործընկեր Դաշնակցությունը ողջամիտ է համարում թեկնածու չառաջադրելու որոշումը: Կուսակցության հայաստանյան կառույցի ղեկավարը նշել է նաեւ, որ ՀՅԴ խմբակցությունը սատարելու է Նիկոլ Փաշինյանի թեկնածությունը:
Ավելի ուշ հայտարարությամբ է հանդես եկել նաեւ «Ծառուկյան» դաշինքի առաջնորդը: «Կենտրոն» հեռուստաալիքին տված հարցազրույցում Գագիկ Ծառուկյանը հայտնել է, որ իրենք նույնպես թեկնածու չեն առաջադրելու. չեն ուզում դեմ գալ ժողովրդին եւ պաշտպանելու են նրա թեկնածուին:
«Իմ քայլը» նախաձեռնության առաջնորդ Նիկոլ Փաշինյանը ՀՀԿ-ի որոշման մասին իմացավ Վանաձորում հանրահավաքի ժամանակ ելույթ ունենալիս: Նա հայտարարեց, որ սա ո՛չ լավ, ո՛չ էլ վատ նորություն է:
Պատգամավորն արձագանքեց նաեւ ՀՀԿ-ական պատգամավոր Սամվել Ֆարմանյանի ֆեյսբուքյան գրառմանը: Հանրապետական պատգամավորը Փաշինյանին հորդորել էր հանդիպել իրենց հետ՝ համոզելու, թե ինչու հենց նրա օգտին պետք է քվեարկեն: Փաշինյանը բեմահարթակից հայտարարեց, որ պատրաստակամ է հանդիպել ՀՀԿ-ի ներկայացուցիչների հետ:
Վանաձորում հանրահավաքի ավարտին Նիկոլ Փաշինյանը ներկայացրեց արդեն ապրիլի 29-ի ծրագրերը: Ամբողջ հանրապետությունում ժամը 12:00-ից փակելու են ճանապարհները, խաղաղ անհնազանդության երթեր են անցկացնելու, իսկ երեկոյան ժամը 19:00-ին Երեւանի Հանրապետության հրապարակում կկայանա ավանդական հանրահավաքը: Դրա համար Փաշինյանը քաղաքացիներին հորդորեց ժամը 16:00-ին բացել բոլոր ճանապարհները: Նշենք, որ «Իմ քայլը» նախաձեռնությունն այսօր մինչեւ Վանաձոր հասնելն ավտոերթով եղել է նաեւ Նիկոլ Փաշինյանի ծննդավայր Իջեւանում:
Արցախի պաշտպանության նախարարությունը ներկայացրել է շփման գծում այս շաբաթ արձանագրված իրավիճակը՝ նշելով, որ լարվածության նկատելի աճ է գրանցվել: Մասնավորապես, ինչպես հաղորդվել էր նաեւ ավելի վաղ, առաջնագծում հակառակորդի կենդանի ուժի եւ զինտեխնիկայի կուտակումներ եւ ակտիվ տեղաշարժեր են եղել: Իրավիճակին ծանոթացել է պաշտպանության նախարար Լեւոն Մնացականյանը, խնդրին արձագանքել են նաեւ ԵԱՀԿ Մինսկի խմբի համանախագահները: Իսկ ապրիլի 22-28-ը, ընդհանուր առմամբ, արցախա-ադրբեջանական շփման գծում հակառակորդը հրադադարի պահպանման ռեժիմը խախտել է ավելի քան 400 անգամ՝ հայ դիրքապահների ուղղությամբ արձակելով շուրջ 4000 կրակոց:
Ֆերդինանդ Կարապետյանը՝ ձյուդոյի 2018 թվականի Եվրոպայի չեմպիոն: Թել Ավիվում կայացած Եվրոպայի առաջնության եզրափակիչում Հայաստանի ներկայացուցիչը 73 կգ քաշային կարգում հաղթել է ադրբեջանցի Հիդայաթ Հեյդարովին: Հավելենք, որ անցյալ ամիս էլ 26-ամյա մարզիկը արծաթե մեդալակիր է դարձել Եկատերինբուրգում կայացած «Մեծ սաղավարտ» միջազգային մրցաշարում: Կիսաեզրափակիչում նա հաղթել է 2016 թվականի օլիմպիական չեմպիոն, իտալացի Ֆաբիո Բազիլեին:
Ապրիլի 29-ին հանրապետության շրջանների զգալի մասում ժամանակ առ ժամանակ տեղումներ են սպասվում: Օդի ջերմաստիճանը ապրիլի 29-ին 2-4 աստիճանով կնվազի, մայիսի 1-3-ը՝ 3-4 աստիճանով կբարձրանա: Երեւանում նույնպես վաղը տեղումներ են սպասվում: Մայրաքաղաքում գիշերը կդիտվի +11+13, ցերեկը՝ +20+22 աստիճան տաքություն: