Հայաստանի մարդու իրավունքների պաշտպան Արմեն Հարությունյանը առաջիկայում հայտարարելու է իր հրաժարականի մասին, քանի որ նշանակվելու է Կենտրոնական Ասիայում ՄԱԿ-ի մարդու իրավունքների հանձնակատարի ներկայացուցիչ։ NEWS.am-ի թղթակցի հարցը, թե ո՞րն է պատճառը, որ այլեւս չեք ուզում շարունակել աշխատել Մարդու իրավունքերի պաշտպան, վրդովվեցրեց Ա. Հարությունյանին. «Մեթոդաբանության եւ էթիկայի տեսակետից սխալ հարց եք տալիս. ես ոչ թե չեմ ուզում լինել Հայաստանի մարդու իրավունքների պաշտպան, այլ ուզում եմ աշխատել այլ պաշտոնում, դա ուզենալու հետ կապ չունի։ Նման պաշտոնից հրաժարվելը կլիներ...պաթոլոգիա, քանի որ այդպիսի պաշտոնի հնարավորություն հարյուր տարին մեկ է լինում»,- ասաց նա:
ՄԻ պաշտպանը հայտարարեց նաեւ, որ առաջիկայում ասուլիս է հրավիրելու, որի ընթացքում մանրամասն ներկայացնելու է իր նոր պաշտոնի էությունը։
Իսկ մինչ նոր պաշտոնն ստանձնելը Արմեն Հարությունյանը մտադիր է հրապարակել Հայաստանում 2010 թվականին մարդու իրավունքների վիճակի վերաբերյալ իր տարեկան զեկույցը, ինչպես նաեւ մեկ այլ՝ արտահերթ զեկույց։
«Էթիկայի տեսակետից սխալ է այդ զեկույցների հրապարակումը թողնել հաջորդ ՄԻՊ-ին»,-նշեց Հարությունյանը՝ հավելելով, որ տարեկան զեկույցն, ամենայն հավանականությամբ, կհրապարակվի առաջիկա մեկ-երկու շաբաթների ընթացքում։ Հարցին, թե ո՞վ է արժանի փոխարինել իրեն ՄԻՊ-ի պաշտոնում, գործող օմբուդսմենն արձագանքեց. «Բոլորն էլ արժանի են, ես ինչպե՞ս կարող եմ ասել՝ այս մարդը արժանի է, մյուսը՝ ոչ։ Կարող եմ ասել, որ ուժեղ գրասենյակ ենք թողնում հաջորդ ՄԻՊ-ի համար»։
Նշենք, որ Արմեն Հարությունյանը ՄԻՊ պարտականությունների կատարմանն է անցել 2006 թ. փետրվարի 20-ից:
