Ուժային կառույցների ղեկավարները մեկը մյուսի հետեւից լքում են պաշտոնները: Նիկոլ Փաշինյանը նախագահին առաջարկել է պաշտոնանկ անել Վլադիմիր Գասպարյանին եւ Գեորգի Կուտոյանին: Արմեն Սարգսյանն արդեն Հայաստանի ոստիկանապետին եւ ԱԱԾ տնօրենին պաշտոններից ազատելու հրամանագրեր է ստորագրել:
Նիկոլ Փաշինյանն արդեն ներկայացրել է Հայաստանի ոստիկանապետի եւ ԱԱԾ տնօրենի պաշտոնում իր թեկնածուներին, նախագահ Արմեն Սարգսյանը՝ հաստատել: Նախագահի հրամանագրով՝ ոստիկանապետ է նշանակվել Երեւանի փոխոստիկանապետ Վալերի Օսիպյանը, ԱԱԾ տնօրեն՝ Արթուր Վանեցյանը: Փաշինյանի որոշմամբ էլ՝ վարչապետի աշխատակազմի ղեկավար է նշանակվել «Քաղաքացիական պայմանագիր» կուսակցության անդամ Էդուարդ Աղաջանյանը:
Ավելի վաղ էլ հրաժարականի մասին հայտարարել էր պաշտպանության նախարար Վիգեն Սարգսյանը: Պաշտոնից հրաժարվելու որոշում են կայացրել նաեւ կառավարությանն առընթեր պետգույքի կառավարման վարչության պետ Արման Սահակյանը, ինչպես նաեւ ֆինանսների նախարարի պաշտոնակատար Վարդան Արամյանը: Սպորտի եւ երիտասարդության հարցերի փոխնախարար Խաչիկ Ասրյանն էլ ոչ միայն պաշտոնից է հրաժարվել, այլեւ լքել է Հանրապետական կուսակցության շարքերը:
Եվս մեկ պատգամավոր հրաժարվեց մանդատից: Մանդատը վայր դնելու դիմում է ներկայացրել ՀՅԴ խմբակցության պատգամավոր, անկուսակցական Արմեն Բաբայանը: Նա, ինչպես նաեւ ՀՀԿ խմբակցության պատգամավոր Տիգրան Ավալյանը, Ազգային ժողովում ներկայացված էին «Գրանդ Հոլդինգի» կողմից: Ընկերության սեփականատերեր Միքայել ու Կարեն Վարդանյաններն այսօր հայտարարություն են տարածել՝ նշելով, որ իրենց ներկայացուցիչները հրաժարվել են մանդատից, քանի որ նոր Հայաստանի Ազգային Ժողովում գործարարների ներկայության կարիք այլեւս չի լինելու:
Արա Բաբլոյանն այսօր արդեն ստորագրել է Գրիգոր Ավալյանի՝ պատգամավորի լիազորությունները դադարած համարելու մասին արձանագրությունը. Ավալյանը հրաժարականի դիմում էր ներկայացրել մեկ շաբաթ առաջ: Նրան Ազգային ժողովում կփոխարինի ՀՀԿ համամասնական ցուցակի 195-րդ հորիզոնականը զբաղեցնող Հակոբ Հակոբյանը. նա «Կիլիկիա» գործարանի սեփականատերն է: Իսկ Արմեն Բաբայանին ՀՅԴ խմբակցությունում կփոխարինի Սպարտակ Սեյրանյանը, Աղվան Վարդանյանի փոխարեն էլ խորհրդարան կգնա Ռուզան Առաքելյանը:
Այսօր Տարոն Մարգարյանի հրաժարականի պահանջով ակցիա է անցկացվել Երեւանի քաղաքապետարանի մոտ: Ցուցարարները պահանջում են նաեւ արձակել ավագանին: Ակցիային միացել են նաեւ ավագանու «Երկիր Ծիրանի» խմբակցության ղեկավար Զարուհի Փոստանջյանը եւ «Ելք»-ից Դավիթ Խաժակյանը: Վերջինը նշել է, որ իրենց խմբակցությունում դեռ չեն քննարկել քաղաքապետի թեկնածուի հարցը:
Ավագանիում ՀՀԿ-ն մեծամասնություն ունի: Այս պարագայում ինչպե՞ս է «Ելք»-ը պատկերացնում քաղաքապետի փոփոխությունը: Հավելենք, որ այսօրվա ակցիայի մասնակիցները նշել են, որ ոչ մի կապ չունեն վարչապետ Նիկոլ Փաշինյանի եւ նրա թիմի հետ:
«Սասնա ծռերի» գործով այսօրվա դատական նիստը չի կայացել: Պաշտպանների խոսքով՝ այսօր պետք է ամբաստանյալների խափանման միջոցը փոխելու միջնորդություններ քննվեին: Փաստաբաններն առաջարկում են կալանավորումը փոխարինել չհեռանալու մասին ստորագրությունը: Փաստաբան Մուշեղ Շուշանյանն էլ նշում է, որ իրենց համար անընդունելի է գործով մի քանի ամբաստանյալների խափանման միջոցը փոխելը, իսկ սպանության մեջ մեղադրվողների կալանավորման որոշումը պահպանելը: Պաշտպանները նաեւ գործով դատավորների եւ մեղադրողների հրաժարականն են պահանջում:
Երեւանում եղբայրը կացնահարել է եղբորը: Հաղթանակ թաղամասում իրավապահները հայտնաբերել են 61-ամյա Աշոտ Ասոյանի դին: Դատաբժշկի նախնական եզրակացության համաձայն՝ մահացածի մարմնի տարբեր մասերին հարվածի հետքեր կան: Իրավապահները սպանությունը կատարելու մեջ կասկածում են զոհի հարազատ եղբորը՝ 52-ամյա Արամ Ասոյանին: Սպանության փաստով քրեական գործ է հարուցվել, կասկածյալը ձերբակալված է:
Մայիսի 10-ին դոլարը սկսել է արժեզրկվել, էժանացել է նաեւ եվրոն: Դոլարի փոխարժեքը կազմել է 486 դրամ, եվրոյինը՝ 577, ռուբլունը՝ 7 դրամ 81 լումա, ֆունտինը՝ 660 դրամ:
Մայիսի 11-ին հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ, առանձին վայրերում՝ կարկուտ: Օդի ջերմաստիճանն էապես չի փոխվի: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +10+12, ցերեկը՝ +22+24 աստիճան տաքություն:
