Արագածոտնի մարզի գյուղերի բնակիչներն այսօր՝ մայիսի 11-ի առավոտից փակել են դեպի Երեւան տանող գլխավոր մայրուղին։
NEWS.am-ի թղթակիցը հաղորդում է, որ այսկերպ գյեւղացիներն իրենց բողոքն են արտահայտում մթերվող կաթի օրեցօր ընկնող գների հետ կապված։ Գյուղացիները նշում են, որ մեկ ամիս առաջ մթերող ընկերությունները կաթը մթերում էին լիտրը 180 դրամով։ Վերջին օրերին, սակայն, մթերողները պարբերաբար տեղեկացրել են իջնող գների մասին։
Այսօր կաթի մեկ լիտրի մթերման գինը հայտարարվել է 110 դրամ, ինչը գյուղացիներն անընդունելի են համարում։ «Ամեն օր գալիս էին, ասում՝ էսօր 10 դրամ էլ է իջնում 20 դրամ էլ է իջնում, մինչեւ բերին հասցրին 110-ի։ Թե պատճառը որն է, ինչի են էդքան իջեցնում, պարզ չի, ոչ մի բացատրություն չեն տալիս»,- մեզ հետ զրույցում նշեցին գյուղացիները։
Թեեւ մայրուղու վրա մեքենաների մեծ կուտակումներ են առաջացել ու մեքենաների վարորդները դժգոհում են, գյուղացիները հրաժարվում են բացել ճանապարհը։ Նրանք պահանջում են մարզպետի ու ՀՀ վարչապետ Նիկոլ Փաշինյանի ուշադրությունը խնդրի կարգավորման համար։
Նրանք նշում են, որ կաթի մթերման գնի նվազեցումը համատարած է բոլոր խոշոր մթերողների կողմից: