Հայաստանի արտաքին քաղաքականությունը քաղաքական ճգնաժամից հետո չի փոխվի: Այս մասին «Ռոսիա 24» հեռուստաալիքին տված հարցազրույցում հայտարարել է Հայաստանի վարչապետ Նիկոլ Փաշինյանը:
«Փոփոխություններից հետո, ըստ էության, Հայաստանի արտաքին քաղաքականության ռազմավարությունը չի փոխվում եւ չի փոխվի», - ասել է Փաշինյանը:
«Ճշմարտությունն այն է, որ մեր գործընթացում, մեր համաժողովրդական շարժման օրակարգում արտաքին քաղաքականության հարց չի եղել: Դա զուտ ներքին քաղաքական գործընթաց էր, որը կապված էր ներքին խնդիրների հետ», - ասել է Փաշինյանը:
Նա շեշտել է, որ ինքը արեւմտամետ կամ ռուսամետ քաղաքական գործիչ չէ, ինչպես նաեւ իրեն ամերիկամետ, իրանամետ կամ վրացամետ քաղաքական գործիչ չի համարում:
«Այս պահին ես վարչապետ եմ, որպես կոնկրետ կուսակցության կամ խմբակցության անդամ չեմ: Հիմա ես ներկայացնում եմ հայ ժողովրդին եւ ապրիլին Հայաստանում տեղի ունեցած համաժողովրդական շարժումը: Եվ այդ շարժումը արտաքին քաղաքականության որեւէ հարց չի բարձրացրել», - ասել է Փաշինյանը:
