ԱՄՆ-ն չպետք է կոշտ դիրքորոշում զբաղեցնի Հյուսիսային Կորեայի հարցում, հայտնել է նախագահ Վլադիմիր Պուտինը Պետերբուրգյան միջազգային տնտեսական ֆորումի շրջանակում միջազգային լրատվական գործակալությունների ղեկավարների հետ հանդիպման ժամանակ։ Այս մասին հայտնել է «ՌԻԱ Նովոստին» ։
Պետության ղեկավարը նշել է, որ լիարժեք միջուկային զինաթափման համար Հյուսիսային Կորեային պետք է տրամադրել ինքնիշխանության ու անվտանգության երաշխիքներ։ «Ես խորապես վստահ եմ, որ եթե ԱՄՆ-ն ոչինչ չպարտադրի, իրեն ագրեսիվ չպահի ու Հյուսիսային Կորեային փակուղու մեջ չդնի, ապա արդյունքը, որը մեզ պետք է, ավելի շուտ կապահովվի, քան շատերը կարծում են, ու ավելի ցածր գնով»,- ասել է Պուտինը։
ԱՄՆ նախագահ Դոնալդ Թրամփը մայիսի 24-ին հրաժարվել էր Հյուսիսային Կորեայի առաջնորդ Կիմ Չեն Ընի հետ հունիսի 12-ին ծրագրված հանդիպումից։ Թրամփը դա պատճառաբանել էր Կիմ Չեն Ընի ագրեսիվ ու ռազմատենչ հայտարարություններով, որոնք արվել էին դրանից առաջ։ Փհենյանն էլ նախօրեին էր իր հերթին սպառնացել խզել հանդիպումը Վաշինգթոնի «վրդովեցուցիչ» գործողությունների ՝ մասնավորապես Սեուլի հետ համատեղ զորավարժությունների պատճառով։ Սակայն այդ նույն օրը Հյուսիսային Կորեան կատարել է իր պարտականությունները՝ պայթեցնելով իր միակ միջուկային հրաձգարանը։ Արդեն այսօր ԱՄՆ իշխանությունները հայտարարություն են արել հյուսիսկորեացիների հետ բանակցությունների վերսկսման հնարավորության մասին։ Հյուսիսային Կորեան էլ իր հերթին պատրաստակամություն է հայտնել «ցանկացած պահի» անցկացնել ԱՄՆ-ի հետ գագաթաժողովը։
