Հայաստանի եւ ԵՄ-ի միջեւ ստորագրված Համապարփակ եւ ընդլայնված գործընկերության մասին համաձայնագիրը ժամանակավոր ուժի մեջ է մտնում հունիսի 1-ից:
Համաձայնագիրն արդեն վավերացրել են Էստոնիայի, Լատվիայի եւ Լիտվայի խորհրդարանները: Համաձայնագիրն ամբողջությամբ ուժի մեջ կմտնի ԵՄ անդամ մնացյալ 25 երկրների խորհրդարանների կողմից վավերացվելուց հետո:
Հիշեցնենք, որ Հայաստանը եւ Եվրամիությունը ստորագրել են նոր Համապարփակ եւ ընդլայնված գոևրծընկերության մասին համաձայնագիր: Փաստաթուղթը ստորագրվել է Բրյուսելում «Արեւելյան գործընկերության» գագաթնաժողովի շրջանակում: Համաձայնագիրը ստորագրել են Հայաստանի ԱԳ նախարար Էդվարդ Նալբանդյանը եւ ԵՄ արտաքին քաղաքականության բարձրագույն հանձնակատար Ֆեդերիկա Մոգերինին՝ Հայաստանի նախագահ Սերժ Սարգսյանի եւ Եվրոպական խորհրդի նախագահ Դոնալդ Տուսկի մասնակցությամբ:
Երեւանի եւ Բրյուսելի միջեւ ասոցացման վերաբերյալ համաձայնագրի բանակցությունները սկսվել էին 2010 թվականի հուլիսին, որը ներառում էր նաեւ ազատ առեւտրի գոտու ստեղծումը, սակայն 2013-ի սեպտեմբերին Հայաստանը հայտարարեց ԵՏՄ-ի մեջ մտնելու մասին եւ հրաժարվեց համաձայնագիրը ստորագրելուց: 2015 թվականին ԵՄ-ն եւ Հայաստանը նոր բանակցություններ սկսեցին նոր համաձայնագրի շուրջ: Անցյալ տարվա մարտին Համապարփակ եւ ընդլայնված գործընկերության մասին համաձայնագիրը նախաստորագրվեց, իսկ նոյեմբերի 24-ին ստորագրվեց: