Սինգապուրի իշխանությունները առավելագույն ջանքեր են ներդնում Հյուսիսային Կորեայի առաջնորդ Կիմ Չեն Ընի եւ ԱՄՆ նախագահ Դոնալդ Թրամփի հանդիպումն արդյունավետ նախապատրաստելու համար: ՏԱՍՍ-ի փոխանցմամբ՝ այս մասին շաբաթ Ասիա-Խաղաղօվկիանոսյան տարածաշրջանում «Շանգրի լա երկխոսություն» անվտանգության հարցերով համաժողովում հայտարարել է երկրի պաշտպանության նախարար Ն Էն Հենը:
«Այս գործընթացին ներգրավված են տարբեր գերատեսչություններ»,- ասել է նա: «Շատերը մեր կատարած աշխատանքի համար շնորհակալություն են հայտնում, իսկ ես ինքս դա ընկալում եմ որպես հաստատում, որ նախապատրաստության գործընթացը անհրաժեշտ ուղղությամբ է ընթանում»,- նշել է նա:
Ն Էն Հենը նշել է, որ «այլ երկրների գործընկերների հետ այսօր ճաշի ժամանակ քննարկել է նաեւ պատրաստվող գագաթնաժողովը: Չնայած տարբեր վերապահումներին ու կասկածներին, բոլորը դրական են արտահայտվում ԱՄՆ եւ Հյուսիսային Կորեայի առաջնորդների միջեւ հանդիպում անցկացնելու ծրագրերի մասին»: «Երկխոսությունը կառուցողական եւ կոնկրետ առաջքայլ է»,- հավելել է գերատեսչության ղեկավարը:
Ուրբաթ Թրամփը դարձյալ հայտարարել է, որ Հյուսիսային Կորեայի առաջնորդի հետ հանդիպումը կկայանա հունիսի 12-ին Սինգապուրում: Սպիտակ տան տերը միաժամանակ նշել է, որ Վաշինգթոնը մտադիր չէ գագաթնաժողովի ժամանակ Փհենյանի հետ որեւէ փաստաթուղթ ստորագրել: Նրա խոսքով՝ ինքը նաեւ չի ցանկանում երկխոսության կարգավորման հեռանկարների ֆոնին այլեւս օգտագործել Հյուսիսային Կորեայի նկատմամբ «առավելագույն ճնշում» տերմինը:
