News
Լրահոս
News
Երկուշաբթի
Հոկտեմբեր 22
Տեսնել լրահոսը


Ամենասպասված մարզական իրադարձության մեկնարկը տրված է. Մոսկվայի «Լուժնիկի» մարզադաշտում բացման հանդիսավոր արարողությամբ մեկնարկեց ֆուտբոլի Աշխարհի առաջնությունը: Այն, ի դեպ, առաջին անգամ է անցկացվում Արեւելյան Եվրոպայում: 30 րոպե տեւած շքեղ արարողությանը մասնակցեցին հանրահայտ երգիչ Ռոբի Ուիլյամսը եւ լեգենդար ֆուտբոլիստներ Իկեր Կասիլյասն ու Ռոնալդուն։

Աշխարհի 21-րդ առաջնության մեկնարկային խաղի արդյունքը տպավորիչ էր. Ռուսաստանի հավաքականը 5:0 հաշվով հաղթեց Սաուդյան Արաբիայի թիմին: Մարզադաշտում խաղին Ռուսաստանի նախագահ Վլադիմիր Պուտինը հետեւում էր Սաուդյան Արաբիայի գահաժառանգ արքայազն Մոհամմադ Սալման ալ Սաուդի հետ: Նշենք, որ առաջնության մեկնարկային խաղին ներկա էր նաեւ Հայաստանի վարչապետը

Իսկ NEWS.am-ն Աշխարհի առաջնությունը կլուսաբանի աննախադեպ ձեւաչափով: Ֆուտբոլասերներին ենք ներկայացնելու 30 մասից բաղկացած բլոգային հատուկ նախագիծ. «Աշխարհի առաջնությունը Վերայի եւ Դավիթի հետ» ամենօրյա շարքը՝ Ռուսաստանի տարբեր քաղաքներից: Նախագծի գլխավոր գործընկերը TotoGaming-ն է, գործընկերը՝ UCOM-ը:

Մոսկվայում գտնվող Նիկոլ Փաշինյանի օրը հագեցած է եղել: Հայաստանի վարչապետն այսօր այցելել է Մոսկվայի հայկական եկեղեցի, Նարեկացու անվան վարժարան, իսկ հետո մասնակցել մարշալ Համազասպ Բաբաջանյանի կիսանդրու բացմանը. այն տեղադրվել է Հայրենական Մեծ պատերազմի մոսկովյան թանգարանում:

Հայաստանի դեսպանատանը կազմակերպված աշխատանքային ճաշի ընթացքում էլ վարչապետը տեղի հայ գործարարներին է ներկայացրել բիզնես միջավայրի բարելավմանը միտված քայլերը, խոսել տնտեսության ոլորտում կառավարության առաջնահերթությունների մասին: Նիկոլ Փաշինյանն այսօր հանդիպել է նաեւ Դմիտրի Մեդվեդեւի հետ. սա երկու երկրների վարչապետերի առաջին հանդիպումն էր:

«Երեւան» հիմնադրամի տնօրեն Աշոտ Ղազարյանն ու Դավիթաշեն վարչական շրջանի ղեկավարի տեղակալ Խաչատուր Կիրակոսյանը ձերբակալվել են: ԱԱԾ-ում հաստատում են լուրը: ԱԱԾ-ականները, հիշեցնենք, երեկ խուզարկություն էին կատարել հիմնադրամի աշխատասենյակներում եւ սեւ տոպրակներ տարել իրենց հետ: Ծառայության գործողությունների պատճառը քաղաքացիների բողոքն էր այն մասին, որ Երեւանի քաղաքապետարանի պաշտոնատար անձինք, կառուցապատման եւ գույքի ձեւակերպման համապատասխան թույլտվություններ տրամադրելու դիմաց, իրենց պարտադրել են «Երեւան» հիմնադրամին փոխանցել խոշոր չափերով գումարներ, սակայն դրանց մի մասը հիմնադրամի հաշվեհամար չի մուտքագրվել, այլ հափշտակվել է:

Ազգային անվտանգության ծառայությունն առանձնապես խոշոր չափերով թմրամիջոցների մաքսանենգության եւ ապօրինի շրջանառության դեպք է բացահայտել: Հանցակիցներն Իրանի եւ Հայաստանի քաղաքացիներ են: Իրանի քաղաքացին 10 կգ ափիոն եւ հերոին է բերել Հայաստան՝ փորձելով իրացնել, սակայն Կապանում ձերբակալվել, իսկ հետո կալանավորվել է: Կալանավորված է նաեւ նրա հայաստանցի հանցակիցը: Հայտնաբերված թմրանյութերը շուրջ 920 հազար դոլար է գնահատվում: ԱԱԾ-ն փորձում է բացահայտել հանցավոր խմբի մյուս անդամներին:

Երվանդ Մանարյանը վիրահատվել է, վիրահատությունը բարեհաջող է անցել: 94-ամյա դերասանը հունիսի 11-ին ազդրի հատվածում կոտրել էր ոտքն ու հիվանդանոց տեղափոխվել: Բժիշկները նրա վիճակը բավարար են գնահատում: Մանարյանը, ամեն դեպքում, շուրջ մեկ շաբաթ հիվանդանոցում կմնա: Դերասանի հետ ֆիզիոթերապեւտներ են աշխատում, որպեսզի հնարավորինս արագ կազդուրվի եւ կարողանա քայլել:

Նախօրեի անկումից հետո դոլարն ու եվրոն թանկացել են: Հունիսի 14-ին դոլարի փոխարժեքը կազմել է 482 դրամ, եվրոյինը՝ 570, ռուբլունը՝ 7 դրամ 76 լումա, ֆունտինը՝ 648 դրամ:

Հունիսի 15-19-ի գիշերը հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ: Օդի ջերմաստիճանը 15-16-ը 1-2 աստիճանով կբարձրանա: Երեւանում նույնպես երեկոյան ժամերին հնարավոր են տեղումներ: Մայրաքաղաքում գիշերը կդիտվի +16+18, ցերեկը՝ +28+30 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 18.10.2018
Ռոբերտ Քոչարյանը պատրաստվում է կուսակցություն ստեղծել եւ ընդդիմություն դառնալ...
Օրվա գլխավոր լուրերը՝ «մեկ տողով». 17.10.2018
Նախօրեին նշանակված երեք նախարարները ամենակարճ պաշտոնավարման ռեկորդ սահմանեցին...
Օրվա գլխավոր լուրերը՝ «մեկ տողով». 16.10.2018
Վարչապետ Նիկոլ Փաշինյանը հրաժարական տվեց: Հանրայինի եթերից նա բացատրել է հրաժարականի նպատակը, ասել է՝ չի փախչում պատասխանատվությունից, այլ, ընդհակառակը, ավարտին է հասցնում հեղափոխությունը...
Օրվա գլխավոր լուրերը՝ «մեկ տողով». 15.10.2018
Երդմնակալությունը նախորդներից տարբեր դարձրեց նաեւ Նավասարդ արքեպիսկոպոս Կճոյանի հեղափոխական «տերմինաբանությամբ» օրհնանքը...
Օրվա գլխավոր լուրերը՝ «մեկ տողով». 11.10.2018
Արտահերթ խորհրդարանական ընտրությունները Հայաստանում տեղի կունենան դեկտեմբերի 9-ին կամ 10-ին...
Օրվա գլխավոր լուրերը՝ «մեկ տողով»
Հոկտեմբերի 10–ին մահացել է «Սասնա ծռեր» խմբի անդամ, «Միայնակ գայլ» անունով հայտնի Արայիկ Խանդոյանը...
Ամենաշատ
Partner news