Գերմանիայում գտնվող Կատալոնիայի նախկին առաջնորդ Կառլես Պուչդեմոնը տարածաշրջանային կառավարությանը խնդրել է իրեն արտոնություններ տրամադրել, որոնք պետք է տրվեն ինքնավարության բոլոր նախկին ղեկավարներին, փոխանցում է «ՏԱՍՍ»-ը՝ վկայակոչելով EFE գործակալությունը:
Գործակալության տեղեկությունների համաձայն՝ Պուչդենոնն իր հայցը ներկայացրել է հունիսի 22-ին: Քաղաքական գործիչը հղում է կատարում կատալոնական օրենքին, որը կարգավորում է նախկին ղեկավարների կարգավիճակը: Այժմ նրան որոշակի նպաստների տրամադրման մասին որոշումը կընդունեն Կատալոնիայի տարածաշրջանային իշխանությունները:
Ըստ կանոնների՝ ինքնավարության կառավարության նախկին ղեկավարը կարող է խնդրել, որպեսզի Ժեներալիտետը հոգա երեք աշխատակցով իր գրասենյակի, վարորդով ավտոմեքենայի եւ անվտանգության ապահովման ծառայությունների ծախսերը: Պուչդեմոնը հնարավորություն ունի պահանջել այդ արտոնությունները: Քանի որ նա մինչը հիմա տարածաշրջանային պատգամավոր է, օրենքը դեռ թույլ չի տալիս նրան ամսական նպաստ պահանջել, որը, օրենքի համաձայն, ստանում են կատալոնացի բոլոր նախկին առաջնորդները:
