News
Լրահոս
News
Ուրբաթ
Օգոստոս 17
Տեսնել լրահոսը


Վերաքննիչ դատարանն ավարտեց Ռոբերտ Քոչարյանի կալանավորման որոշման դեմ պաշտպանների բողոքի քննությունը: Որոշումը կհրապարակվի օգոստոսի 13-ին: Երկրորդ նախագահի պաշտպանները լավատես են: Արամ Օրբելյանը, միաժամանակ, հիմնավորված չի համարում մեղադրող կողմի պնդումները, թե ազատության մեջ գտնվելով՝ Ռոբերտ Քոչարյանը ոչ պատշաճ վարքագիծ կդրսեւորի:

Ավելին, ըստ փաստաբանի, պաշտպանության նախկին նախարար Միքայել Հարությունյանին մեղադրանք առաջադրելուց հետո կարելի էր ակնկալել, որ Ռոբերտ Քոչարյանը նույնպես մեղադրյալի կարգավիճակում կարող է հայտնվել, սակայն, չնայած դրան, երկրորդ նախագահը վերադարձել է Հայաստան եւ ներկայացել քննչական մարմնին:

Յուրի Խաչատուրովի պաշտպանը վերաքննիչ բողոք է ներկայացրել՝ բողոքարկելով առաջին ատյանի որոշումը: Միհրան Պողոսյանն ասում է՝ թեեւ առաջին ատյանի դատարանը որպես խափանման միջոց կիրառել է 5 մլն դրամի չափով գրավը, սակայն դա կալանավորմանն այլընտրանքային խափանման միջոց է: ՀԱՊԿ գլխավոր քարտուղարն օգոստոսի 4-ին հեռացել է Հայաստանից. նա Մոսկվա է վերադարձել եւ անցել պարտականությունների կատարմանը: Քննչական մարմնի առաջին իսկ պահանջով, սակայն, Խաչատուրովը պարտավոր է ներկայանալ: Հիշեցնենք, որ 2008 թվականին Յուրի Խաչատուրովը Զինված ուժերի Երեւանի կայազորի պետն էր: Իսկ մարտի 1-ի գործով սահմանադրական կարգը տապալելու մեղադրանք է առաջադրվել նաեւ պաշտպանության նախկին նախարար Միքայել Հարությունյանին: Նա հետախուզման մեջ է:

Վարչապետ Նիկոլ Փաշինյանը երկօրյա աշխատանքային այցով Տավուշի մարզում է: Այսօր վարչապետը հանդիպումներ է ունեցել Բերդ ու Նոյեմբերյան քաղաքներում: Զրուցել է բնակիչների հետ, ինչպես նաեւ խորհրդակցություններ անցկացրել համայնքապետերի մասնակցությամբ: Նոյեմբերյանում հանդիպման ժամանակ վարչապետը խոսել է նաեւ ադրբեջանական տարածքում հայտնված Տավուշի Բերդավան համայնքի բնակիչ Կարեն Ղազարյանի մասին:

Իսկ լրագրողների հետ զրույցում Փաշինյանը մեկնաբանել է հայաստանյան վերջին իրադարձությունների հետ կապված Սերգեյ Լավրովի հայտարարությունը:

Լրագրողները Նիկոլ Փաշինյանին հարցրել են նաեւ Ռոբերտ Քոչարյանի կալանավորման եւ նրա կողմնակիցների պնդումների մասին, թե երկրորդ նախագահի նկատմամբ քաղաքական հետապնդում է իրականացվում։ Հավելենք, որ օգոստոսի 11-ին արդեն Նիկոլ Փաշինյանը կլինի Իջեւանում եւ Դիլիջանում:

Շիրակի պետական համալսարանի նախկին պրոռեկտոր Անահիտ Ֆարմանյանին մեղադրանք է առաջադրվել, նաեւ նրան կալանավորելու որոշում է կայացվել: Առաջադրված մեղադրանքը առանձնապես խոշոր չափերով խարդախության հատկանիշներով է: Անահիտ Ֆարմանյանը հետախուզման մեջ է: Նշենք, որ նա Ազգային ժողովի ՀՀԿ-ական պատգամավոր Սամվել Ֆարմանյանի քույրն է: Անդրադառնալով մեղադրանքին՝ պատգամավորը հայտարարարել է, որ Անահիտ Ֆարմանյանը «հարուցված գործի հետ կապ ունի այնքանով», որքանով իր հարազատ քույրն է:

Հայաստանում եւս մեկ կուսակցություն կստեղծվի: Նոր ուժը պատրաստվում է ստեղծել քաղաքագետ Լեւոն Շիրինյանն ու մասնակցել ԱԺ արտահերթ ընտրություններին: Քաղաքագետը նշել է, որ մի խումբ համախոհների հետ Հայաստանի Քրիստոնեա-դեմոկրատական կուսակցություն (ՀՔԴԿ) են ստեղծելու՝ իրենց նպաստը բերելու հայրենիքի վերաշինության եւ «Չորրորդ հանրապետության կայացման գործում»:

«Ժառանգություն»-ը հայտարարել է Երեւանի ավագանու ընտրություններին մասնակցելու որոշման մասին: Կուսակցությունն այսօր վարչության նիստ է անցկացրել՝ օրակարգային մեկ՝ ավագանու ընտրությունների հարցով: «Ժառանգություն»-ը, սակայն, դեռեւս չի հայտնում, թե ո՞վ է իրենց քաղաքապետի թեկնածուն կամ ի՞նչ ձեւաչափով են մասնակցելու ընտրություններին:

Վրաստանում Կազբեգի լեռան վրա այս տարվա առաջին ձյունն է տեղացել: Կազբեգին Կովկասի ամենաբարձր լեռներից է եւ մշտապես սառույցով է պատված: Ձյուն է տեղացել նաեւ վրացական Գուդաուրի լեռնային հանգստավայրում: Վրաստանում հյուսիս-արեւմուտքից սառը օդային հոսանքներ են սպասվում, ժամանակ առ ժամանակ՝ անձրեւ, ամպրոպ եւ կարկուտ: Քամու ուժգնացման հետեւանքով էլ ծովի ալիքների տատանումները կկազմեն 3-4 բալ:

Մինչ այդ հաղորդվել էր Սեւ ծովի վրացական ափերին փոթորկի վտանգի մասին: Աջարիայում արդեն տեղատարափ անձրեւներ են գրանցվել: Բաթումում, Քոբուլեթիում եւ Մախինջաուրիում փողոցներն ու ավտոճանապարհները ջրածածկ են եղել: Բաթումում ավտոտրանսպորտի երթեւեկությունը խափանվել է, շենքերի նկուղները, ինչպես նաեւ առաջին հարկերում գտնվող բազմաթիվ խանութներ հեղեղվել են, շուրջ մեկ տասնյակ գյուղեր էլ հոսանքազրկվել են: Հատուկ շտաբ է ստեղծվել՝ ջրհեղեղի հետեւանքների դեմ պայքարելու համար:

Օգոստոսի 10-ին դոլարը փոքր-ինչ թանկացել է, իսկ եվրոն՝ կտրուկ նվազել: Դոլարի փոխարժեքը կազմել է 482 դրամ, եվրոյինը՝ 552, ռուբլունը՝ 7 դրամ 21 լումա, ֆունտինը՝ 616 դրամ:

Օգոստոսի 11-ի գիշերը եւ երեկոյան ժամերին հանրապետության շրջանների զգալի մասում սպասվում է անձրեւ եւ ամպրոպ, առանձին հատվածներում հնարավոր է կարկուտ: Օդի ջերմաստիճանը 3-5 աստիճանով կնվազի: Երեւանում նույնպես առանձին հատվածներում տեղումներ են սպասվում: Մայրաքաղաքում գիշերը կդիտվի +19+21, ցերեկը՝ +30+32 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 16.08.2018
Տապալված մամուլի ասուլիսից հետո Ռոբերտ Քոչարյանն առաջին հարցազրույցն է տվել եւ հայտարարել, որ քաղաքականություն է վերադարձել...
Օրվա գլխավոր լուրերը՝ «մեկ տողով». 15.08.2018
Առողջապահության նախարարությունում ռումբի մասին կեղծ ահազանգի հեղինակն առողջական խնդիրներ ունեցող քաղաքացի է...
Օրվա գլխավոր լուրերը՝ «մեկ տողով». 14.08.2018
ՀՀ երկրորդ նախագահ Ռոբերտ Քոչարյանն այսօր մամուլի ասուլիս էր հրավիրել. այն, սակայն, տապալվել է...
Օրվա գլխավոր լուրերը՝ «մեկ տողով». 13.08.2018
Ռոբերտ Քոչարյանն անձեռնմխելի է. Վերաքննիչ դատարանը բավարարեց երկրորդ նախագահի պաշտպանների միջնորդությունը եւ հենց դատարանի դահլիճից...
Օրվա գլխավոր լուրերը՝ «մեկ տողով». 09.08.2018
Վերաքննիչ դատարանը սկսել է քննել Ռոբերտ Քոչարյանի խափանման միջոցը փոխելու մասին պաշտպանների միջնորդությունը...
Օրվա գլխավոր լուրերը՝ «մեկ տողով». 08.08.2018
Հովիկ Աբրահամյանի եղբայրը՝ Հենրիկ Աբրահամյանը ձերբակալվել է. նրան կասկածում են ապօրինի կերպով հրազեն ու ռազմամթերք...
Partner news