Նիկոլ Փաշինյանը Մոսկվա կմեկնի սեպտեմբերի 8-ին: Ռուսաստան այցի մասին վարչապետը հայտնել էր ֆեյսբուքյան ուղիղ եթերում, իսկ այցի ժամկետների մասին տեղեկացրել են Կրեմլից: Վլադիմիր Պուտինի հետ Նիկոլ Փաշինյանը պատրաստվում է քննարկել երկկողմ հարաբերությունների օրակարգային հարցեր: Այցի ընթացքում վարչապետը կհանդիպի նաեւ Մոսկվայի հայ գործարարների հետ: Նշենք, որ կառավարության ղեկավարի պաշտոնը ստանձնելուց հետո սա Փաշինյանի երրորդ այցը կլինի Ռուսաստան:
Նիկոլ Փաշինյանն այսօր լրագրողների հետ զրույցում անդրադարձել է Սերգեյ Լավրովի՝ Հայաստանում թեժ իրավիճակի մասին հայտարարությանը. Ռուսաստանին մտահոգում է, որ «Հայաստանում տասնամյա վաղեմության իրադարձություններ են քննվում, կալանավորվում են իրականացվում»: Ռուսաստանցի պաշտոնյայի հայտարարությունը վարչապետը կատակով է մեկնաբանել:
Փաշինյանը նորմալ է համարում խորհրդարանական ընտրություններին մասնակցելու՝ Հայաստանի երկրորդ նախագահի ցանկությունը: Ասել է՝ բոլոր նրանք, ովքեր օրենքով խորհրդարանական ընտրությունների անցկացման ժամանակ հնարավորություն եւ ցանկություն կունենան մասնակցելու ընտրություններին, կմասնակցեն: Ինչ վերաբերում է մեկ այլ նախկին նախագահի. մամուլում լուրեր են շրջանառվում, որ Նիկոլ Փաշինյանը ցանկանում է Լեւոն Տեր-Պետրոսյանին երկրի նախագահ դարձնել: Վարչապետը սա աբսուրդ է որակել:
Արցախի անկախության օրը Հայաստանը շատ բարձր մակարդակով ներկայացված էր Ստեփանակերտում: Սա էլ՝ ի պատասխան տարակուսանքին, թե ինչո՞ւ սեպտեմբերի 2-ին Նիկոլ Փաշինյանն Արցախում չէր:
Եվ, վերջապես, վարչապետի «Քաղաքացիական պայմանագիր» կուսակցությունից Երեւանի քաղաքապետի թեկնածու առաջադրված Հայկ Մարությանի՝ «սեւի ու սպիտակի» եւ «մեր թիմի դեմ խաղ չկա» աղմկահարույց հայտարարության մասին: Փաշինյանը կարծում է՝ թյուրըմբռնում է եղել:
Մարտի 1-ի գործով մեղադրյալ Ռոբերտ Քոչարյանի նկատմամբ խափանման միջոց է ընտրվել չհեռանալու մասին ստորագրությունը: Որոշումը կայացրել է Հատուկ քննչական ծառայության քննիչը: Նախկին նախագահի պաշտպանները դեռ չեն ծանոթացել որոշմանը եւ չեն մեկնաբանում այն: Փոխարենը վաղը մամուլի ասուլիս են հրավիրել:
Մինչ այս որոշումը հայտնի էր դարձել, որ Ռոբերտ Քոչարյանը պատրաստվում է մի քանի օրով մեկնել Հայաստանից, սակայն տեխնիկական խնդիրներ են առաջացել: Հայկ Ալումյանի տեղեկացմամբ՝ ՀՔԾ-ն չի վերադարձրել նախկին նախագահի անձնագրերը: Փաստաբանը սա օրենքի խախտում, կամայականություն է որակել՝ նշելով, որ քննարկում են դրա դեմ պայքարին ընթացք տալու հարցը: Ալումյանը չի բացառել, որ կարող են նաեւ Մարդու իրավունքների եվրոպական դատարան դիմել: Հիշեցնենք, որ հուլիսի 27-ին Հայաստանի երկրորդ նախագահը կալանավորվել էր, իսկ ավելի ուշ, Վերաքննիչ դատարանի որոշմամբ, անձեռնմխելիության հիմքով ազատ արձակվել:
«Երեւան» հիմնադրամում չարաշահումների գործով հարցաքննվելու է նաեւ նախկին քաղաքապետ Տարոն Մարգարյանը. նա հիմնադրամի հոգաբարձուների խորհրդի նախագահն էր: Իսկ հարցաքննության օրը, ԱԱԾ ղեկավար Արթուր Վանեցյանի խոսքով, քննչական խումբն է որոշելու: Հիշեցնենք, որ ԱԱԾ քննչական վարչությունում պաշտոնեական լիազորությունները չարաշահելու եւ պաշտոնական դիրքն օգտագործելով՝ խարդախություն կատարելու հոդվածներով քրեական գործը հարուցվել է երկու քաղաքացու բողոքի հիման վրա: Նրանք պնդում են, որ Երեւանի քաղաքապետարանի պաշտոնատար անձինք իրենց պարտադրել են «Երեւան» հիմնադրամին խոշոր չափերի գումարներ փոխանցել:
Ինչ վերաբերում է նոր բացահայտումներին. Արթուր Վանեցյանի խոսքով՝ ԱԱԾ-ն ոչ թե հանգիստ է, այլ չի հրապարակում բացահայտումները: Ասում է՝ ի սկզբանե դեմ է եղել ծառայության հրապարակային գործունեությանը:
Նախկին ոստիկանապետ Վլադիմիր Գասպարյանի առանձնատան մասին հոդվածի հիման վրա քրեական գործ է հարուցվել: «Վլադիմիր Գասպարյանը 200 հազար դոլարով դարձել է 3 մլն դոլարանոց առանձնատան տեր» վերնագրով հոդվածը հրապարակել է «Hetq.am»-ը, իսկ գործը հարուցվել է առանձնապես խոշոր չափերով խարդախություն կատարելու եւ պաշտոնատար անձանց կողմից պաշտոնեական լիազորություններն անցնելու առերևույթ հանցագործության հատկանիշներով:
Գասպարյանի փաստաբան Տիգրան Աթանեսյանը, սակայն, հոդվածի հիման վրա քրեական գործ հարուցելու հիմք չի տեսնում: Ասում է՝ ճշմարտությունը պարզ դառնալուն պես նախաքննական մարմինն այն արագ կկարճի: Նա նաեւ վստահեցնում է, որ Վլադիմիր Գասպարյանը ոչ ոքի գույքին չի տիրացել. հոդվածում նշված առանձնատունը ձեռք է բերել նրա ընկերը, ամբողջ գումարը վճարել է՝ 2 մլն դոլարից ավելի, պարզապես հիմա, ըստ Աթանեսյանի, նախկին սեփականատերերը, շահարկելով Վլադիմիր Գասպարյանի անունը, փորձում են ինչ-որ խնդիրներ լուծել:
Արցախում ավտովթարի հետեւանքով զինծառայող է մահացել: Պատահարի հետեւանքով զոհվել է Պաշտպանության բանակի 28-ամյա պայմանագրային զինծառայող Վազգեն Խաչատրյանը: Դեպքի մանրամասները պարզելու համար կատարվում է քննություն:
Դոլարի վերելքը շարունակվում է, եվրոն էժանանում է: Սեպտեմբերի 4-ին դոլարի փոխարժեքը կազմել է 483 դրամ, եվրոյինը՝ 559, ռուբլունը՝ 7 դրամ 09 լումա, ֆունտինը՝ 620 դրամ:
Սեպտեմբերի 5-ին հանրապետության հյուսիսային շրջաններում երեկոյան ժամերին սպասվում է կարճատեւ անձրեւ եւ ամպրոպ, առանձին հատվածներում՝ կարկուտ: Օդի ջերմաստիճանը 2-3 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +31+33 աստիճան տաքություն: