Ազգային ժողովը Քննիչ հանձնաժողով է ստեղծել. այն 11 անդամ կունենա խորհրդարանում ներկայացված քաղաքական ուժերից: Արա Բաբլոյանին նման պահանջով դիմել էր պատգամավորների 1/4-ը, իսկ առիթը ուժային կառույցների ղեկավարների հեռախոսազրույցի սկանդալային ձայնագրությունն է: Քննիչ հանձնաժողովը պետք է ուսումնասիրի արդարադատության կայացմանը խոչընդոտելու, արդար դատաքննության իրավունքի եւ հեռախոսային խոսակցությունների գաղտնիությունը խախտելու փաստերը:
Մինչ այդ, գլխավոր դատախազությունը հեռախոսազրույցի ձայնագրության դեպքով հերթական գործն է հարուցել: Այս անգամ իրավապահները դրանում ԱԱԾ տնօրենի եւ ՀՔԾ պետի կողմից պաշտոնեական լիազորություններն անցնելու տվյալներ են նկատել:
Պատգամավոր Արմեն Աշոտյանը սա ափալ-թափալ հարուցված գործ է համարում, որի նպատակը, ըստ նրա, խորհրդարանի կողմից Քննիչ հանձնաժողով ստեղծելուն խոչընդոտելն է: Սակայն խորհրդարանի լիազորություններից վախենալ, Աշոտյանի խոսքով, պետք չէ:
Վերադառնալով ձայնագրությանը. Արթուր Վանեցյանի եւ Սասուն Խաչատրյանի հեռախոսազրույցը գաղտնալսելու մեջ «Ելք»-ից Ալեն Սիմոնյանը կասկածում է երկրորդ նախագահին ու ՀՀԿ-ին: Իրավաբան պատգամավոր Գեւորգ Կոստանյանն արագորեն արձագանքել է. եթե Ալեն Սիմոնյանը նման հայտարարություն է անում, ուրեմն տեղեկություն ունի եւ անպայման պետք է ցուցմունք տա:
Իսկ նախկին նախագահը հեռախոսազրույցին անդրադարձել էր երեկ՝ հայտարարելով, որ ձայնագրությունն էլ ապացուցեց, որ նպատակը ոչ թե Մարտի 1-ը բացահայտելն է, այլ իրեն «փակելը»: Ռոբերտ Քոչարյանին այսօր պատասխանել է Նիկոլ Փաշինյանը:
Կառավարության հերթական նիստն այսօր տեղի չունեցավ. պատճառը «Շանթ 2018» ռազմավարական հրամանատարաշտաբային զորավարժություններն էին: Գործադիրը նիստ կգումարի ուրբաթ՝ սեպտեմբերի 14-ին: Այն, ամենայն հավանականությամբ, կվարի առաջին փոխվարչապետ Արարատ Միրզոյանը, քանի որ վարչապետը հանրապետությունում չէ:
Նիկոլ Փաշինյանը երկօրյա այցով Փարիզ է մեկնել: Վաղը նա կհանդիպի Ֆրանսիայի նախագահ Էմանուել Մակրոնի, իսկ հետո՝ տեղի հայ համայնքի ներկայացուցիչների հետ: Ի դեպ՝ այս ամսվա ընթացքում վարչապետը եւս մեկ այց կկատարի արտերկիր: Սեպտեմբերի վերջին Փաշինյանը Նյու Յորքում կմասնակցի ՄԱԿ-ի Գլխավոր վեհաժողովի բացմանը: Նախատեսվում են մի շարք երկկողմ հանդիպումներ, որոնց մասին, սակայն առայժմ ոչինչ չի հաղորդվում:
Վլադիմիր Պուտինը պաշտոնական այցով Հայաստան կժամանի: Այս մասին հայտնել է Ռուսաստանի նախագահի մամուլի խոսնակը: Այցի ժամկետը, սակայն, դեռ չի որոշվել: Պուտինին Երեւան է հրավիրել վարչապետ Նիկոլ Փաշինյանը, սեպտեմբերի 8-ի մոսկովյան այցի ընթացքում: Հայտնի է նաեւ, որ սեպտեմբերի վերջին Կրեմլի ղեկավարը մտադիր է Ադրբեջան այցելել:
Արցախի հարցով Ադրբեջանի համար ցանկալի ձեւակերպումը տեղ չի գտել ԵԽԽՎ հերթական զեկույցի նախագծում: Այս մասին գրել է Վեհաժողովում հայկական պատվիրակության ղեկավար Արփինե Հովհաննիսյանը՝ կարծիք հայտնելով, որ դրանով է պայմանավորված Իլհամ Ալիեւի, իր խոսքով՝ «պաթոսախեղդ հիստերիան»: Խոսքը «Լեռնային Ղարաբաղն Ադրբեջանի մասն է» ձեւակերպման մասին է, որն արդեն մի քանի անգամ է՝ դուրս է մնում ԵԽԽՎ զեկույցից: Նշենք, որ Բաքվում ԵԱՀԿ գլխավոր քարտուղարի հետ հանդիպմանն Ալիեւը պնդել էր, թե Ղարաբաղի ներկայացուցիչների հետ բանակցություններ վարելու մասին Նիկոլ Փաշինյանի հայտարարություններն անընդունելի են Ադրբեջանի համար: Նա պնդել է, թե ադրբեջանական կողմի մոտ տպավորություն է՝ ասես Փաշինյանն ամեն կերպ փորձում է ձախողել բանակցային գործընթացը, եւ այդ դեպքում ամբողջ պատասխանատվությունը կընկնի հայկական կողմի եւ անձամբ Փաշինյանի վրա։
Սեպտեմբերի 13-ին դոլարն էժանացել է, եվրոն եւ ռուբլին՝ թանկացել: Դոլարի փոխարժեքը կազմել է 485 դրամ, եվրոյինը՝ 563, ռուբլունը՝ 7 դրամ 8 լումա, ֆունտինը՝ 633 դրամ:
Սեպտեմբերի 14-ին հանրապետությունում սպասվում է առանց տեղումների եղանակ: Օդի ջերմաստիճանը 3-4 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +34+36 աստիճան տաքություն: