Անհրաժեշտ է ձգտել Սիրիայից օտարերկրյա բոլոր, այդ թվում՝ Ռուսաստանի զորքերի դուրսբերմանը, եթե երկրի կառավարությունն այդպիսի որոշում ընդունի։ Այս մասին հայտարարել է ՌԴ նախագահ Վլադիմիր Պուտինը՝ տեղեկացնում է ՏԱՍՍ-ը։
«Մենք պետք է ձգտենք նրան, որ Սիրիայի տարածքում ընդհանրապես որեւէ օտարերկրյա, երրորդ երկրի զորք չլինի»,- ասել է Պուտինը՝ հավելելով․ «Ներառյալ Ռուսաստանը, եթե դա կորոշվի Սիրիայի Արաբական Հանրապետության կառավաության մակարդակով»։
Նա նաեւ նշել է, ու ԱՄՆ-ն իր զինծառայողներին երկրի տարածքում պահելու համար պետք է ստանա ՄԱԿ ԱԽ-ի մանդատ կամ Սիրիայից հրավեր, այլապես Վաշինգթոնը խախտում է միջազգային իրավունքի նորմերը։ Տվյալ դեպքում, ըստ նրա, ԱՄՆ-ը խախտում է ՄԱԿ կանոնադրությունը եւ այլ երկրի տարածքում զորամիավորումներ պահելու միջազգային իրավունքը։
Պուտինի խոսքերով՝ նախկինում Ռուսաստանը ելնում էր նրանից, որ համագործակցում էր ԱՄՆ-ի հետ՝ Սիրիայում ահաբեկչության դեմ, սակայն հաշվի առնելով, որ ԻԳԻԼ-ը դադարում է գոյություն ունենալ Սիրիայի տարածքում, օտարերկրյա զորքերի այնտեղ ներկայությունը բացատրություն չունի։
ՌԴ նախագահը նաեւ անդրադարձել է Իդլիբի նահանգում ապասպառազինված գոտի ստեղծելու մասին Ռուսաստանի եւ Թուրքիայի միջեւ համաձայնագրին՝ այն անվանելով «շատ լավ գործարք»։