Դեր Զոր նահանգի Ալ-Շաաֆ գյուղում միջազգային կոալիցիայի օդային հարվածների հետեւանքով ավելի քան 30 քաղաքացիական անձ՝ հիմնականում կանայք եւ երեխաներ, զոհվել են, հաղորդում է ՍԱՆԱ-ն:
«Տեղական աղբյուրները ՍԱՆԱ գործակալության թղթակցին հայտնել են, որ ԱՄՆ-ի գլխավորած անօրինական կոալիցիայի ավիացիան, որը ստեղծվել է ԻՊ դեմ պայքարի պատրվակով, առանց ՄԱԿ ԱԽ մանդատի, Աշ-Շաաֆի բնակիչների տներին հարվածներ է հասցրել: Զոհերի թիվը կարող է ավելանալ մեծ թվով ավերվածությունների եւ տուժողներին փլատակներից դուրս բերելու դժվարությունների պատճառով:
Պետք է հիշեցնել, որ անցյալ շաբաթ Աշ-Շաաֆ գյուղի եւ Հաջին քաղաքի բնակիչների տներին կոալիցիայի հասցրած հարվածներից 45 խաղաղ բնակիչ էր մահացել, նրանց մեծ մասը կանայք եւ երեխաներ», -նշվում է գործակալության հաղորդագրությունում:
ՍԱՆԱ-ն հաղորդում է, որ Սիրիան բազմիցս դիմել է ՄԱԿ գլխավոր քարտուղարին եւ ԱԽ նախագահին կոչ անելով օգնել դադարեցնել Վաշինգթոնի գլխավորած կոալիցիայի ավիահարվածները, անկախ միջազգային մեխանիզմ ստեղծել այս հանցագործությունների հետաքննության եւ մեղավորներին պատժելու համար: