Վրաստանի նախագահ Սալոմե Զուրաբիշվիլին դիմել է երկրի խորհրդարանին՝ խնդրելով երկարացնել Վրաստանի առաջին նախագահ Զվիադ Գամսախուրդիայի սպանության գործի քննության ժամկետը: Այս մասին հայտնում է «Նովոստի-Գրուզիան»՝ վկայակոչելով երկրի նախագահի մամուլի ծառայությանը:
Գամսախուրդիան չպարզված հանգամանքներում մահացել է 1993 թվականի դեկտեմբերի 31-ին Արեւմտյան Վրաստանում բարձրլեռնային Ձեւելի գյուղում: Այն ժամանակ իրականացված քննության արդյունքների համաձայն՝ նա ինքնասպան էր եղել: Նախկին նախագահի ընտանիքը պնդում է, որ Էդուարդ Շեւարդնաձեի նախագահության օրոք նրան սպանել են իշխանության ներկայացուցիչները: 2015 թվականին երկրի գլխավոր դատախազությունը գործը վերաորակել էր «սպանություն՝ կապված զոհի ծառայողական գործունեության հետ կամ նրա մերձավոր ազգականի, կամ նրանց կողմից հասարակական պարտականությունների կատարման հետ» հոդվածով:
Ըստ Վրաստանի Քրեական օրենսգրքի՝ դեկտեմբերի 31-ին լրանում է վաղեմության 25 տարին, որից հետո մեղավորներին չեն կարող դատել:
Դեկտեմբերի 14-ին Գամսախուրդիայի որդիները հացադուլ էին հայտարարել՝ պահանջելով քննությունը մինչեւ վերջ հասցնել: Նրանք Վրաստանի իշխանություններին կոչ էին արել երկրի գլխավոր հրամանատարների եւ բարձրագույն պաշտոնատար անձանց հետ կապված գործերի քննության վաղեմության ժամկետը երկարացնել:
«Որպես Վրաստանի նախագահ՝ ես չեմ կարող չհամաձայնել Զվիադ Գամսախուրդիայի ընտանիքի մտահոգություններին ու պահանջներին Վրաստանի առաջին նախագահի սպանության գործի քննության ժամկետը երկարացնելու վերաբերյալ: Ես գիտեմ, որ դրա համար անհրաժեշտ է անցկացնել համապատասխան օրենսդրական միջոցառումներ, իսկ դա նախագահի իրավասության ներքո չէ: Դիմում եմ օրենսդիր մարմնին եւ խնդրում հնարավորության շրջանակում այս հարցում նախատեսել իմ եւ Զվիադ Գամսախուրդիայի ընտանիքի անդամների պահանջը»,- նշված է Վրաստանի խորհրդարանին հղած Զուրաբիշվիլիի նամակում:
