ԿԺԴՀ–ի եւ ԱՄՆ–ի հարաբերությունների կարգավորումը պետք է ուղեկցվի Փհենյանի նկատմամբ պատժամիջոցների մեղմացմամբ։ Այս մասին գրված է ԿԺԴՀ–ի կենտրոնական «Նոդո սինմուն» թերթի չորքշաբթի հրատարակված թերթում։
«Երկկողմ հարաբերությունների լավացումը չի կարող զուգորդվել պատժամիջոցներով», ընդգծում է պարբերականը։ Այն նաեւ մեղադրել է ԱՄՆ–ին, որ վերջին կես տարում նրա իրականացրած քաղաքականությունը նշանակալի տեղաշարժ չի գրանցել Կորեական թերակղզում ապամիջուկայնացման գործում։ Պարբերականը նաեւ նշել է, որ Փհենյանը ձգտում է կարգավորել հարաբերությունները Վաշինգտոնի հետ տարածաշրջանում կայուն խաղաղություն հաստատելու համար, հաղորդում է ՏԱՍՍ–ը։
Պատմության մեջ առաջին անգամ ԱՄՆ–ի եւ ԿԺԴՀ–ի ղեկավարների հանդիպումը կայացավ 2018 թվականի հունիսի 12–ին Սինգապուրում։ Դոնալդ Թրամփն ու Կիմ Չեն Ընն ընդունեցին միասնական հայտարարություն։ Փհենյանը հայտարարեց, որ սկզբունքորեն պատրաստ է լրիվ ապամիջուկայնացմանը, իսկ Միացյալ նահանգները պարտավորվեց երաշխավորել ԿԺԴՀ–ի անվտանգությունը։
