Ադրբեջանը չի թաքցնում, որ իր գլխավոր նպատակը եղել եւ մնում է հայկական պետականության ոչնչացումը: Այս մասին ասաց Արցախի նախագահի աշխատակազմի ղեկավարի տեղակալ, աշխատակազմի Գլխավոր տեղեկատվական վարչության պետ Դավիթ Բաբայանը՝ NEWS.am-ի թղթակցի խնդրանքով մեկնաբանելով ադրբեջանական կողմի հերթական չհայտարարված խոշորածավալ զորավարժությունների անցկացումը:
«Բացի այն, որ զորավարժությունները հայտարարված չէին, ինչը ինքնին ԵԱՀԿ առջեւ ստանձնած պարտավորությունների խախտում է, ուշադրություն է գրավում թեման: Շարային վարժությունների ժամանակ ներկայացվել է, որ հաջորդ քայլը Շուշիի գրավումն է: Իհարկե, դա վկայում է իրականությունից չափից ավելի կտրված եւ վիրտուալ իրականության մեջ լինելու մասին, բայց մենք նաեւ ծայրահեղ աչալուրջ լինելու անհրաժեշտություն ունենք»,- նշեց Դավիթ Բաբայանը:
Արցախի նախագահի աշխատակազմի ղեկավարի տեղակալը նշեց, որ Լեռնային Ղարաբաղը իր ժամանակին շատ բարձր է գնահատել Հայաստանի վարչապետի գործողությունները, որոնց հետեւանքով թվական իմաստով կրճատվել է հրադադարի ռեժիմի խախտումների թիվը. «Սակայն սա այսբերգի միայն գագաթն է: Ադրբեջանը չի հրաժարվել իր մտադրություններից եւ չի թաքցնում, որ իր գլխավոր նպատակը եղել եւ մնում է հայկական պետականության ոչնչացումը: Սրա վկայությունն է նաեւ մեծ քանակությամբ լայնածավալ զորավարժությունների անցկացումը, ընդ որում՝ դրանց կեսը Թուրքիայի հետ»:
«Միասնությունը մեր հաջողության գրավականն է: Բոլոր նրանք, ովքեր սասանում են միասնությունը, հայ ժողովրդի մի հատվածին թունավորում մյուսի հանդեպ, պետք է արժանանան ամենալուրջ դատապարտման եւ նախատինքի»,- եզրափակեց Դավիթ Բաբայանը:
