Սիրիայի նախագահ Բաշար Ասադը կատակ է անվանել ամերիկացի պաշտոնակցի խոսքերը, որը շնորհակալություն էր հայտնել Սիրիայի իշխանություններին «Իսլամական պետություն» (ԻՊ, արգելված է Ռուսաստանում) ահաբեկչական խմբավորման պարագլուխ Աբու Բաքր ալ Բաղդադիի վերացման գործում օգնության համար, տեղեկացնում է ՏԱՍՍ-ը՝ հղում կատարելով Սիրիայի նախագահի՝ ֆրանսիական Paris Match ամսագրին տված հարցազրույցին։
«Ինձ միշտ զվարճացնում է այդ հարցը, որովհետեւ ավելի կարեւոր հարց է, թե արդյոք իսկապես ալ Բաղդադին սպանված է, եւ արդյոք իսկապես այդ գեղեցիկ կատակերգությունը, որ խաղարկեցին ամերիկացիները, ճշմարիտ է»,- պատասխանել է Ասադն այն հարցին, թե արդյոք նա ԱՄՆ-ին տեղեկություն հաղորդել է ալ Բաղդադիի մասին։ Միեւնույն ժամանակ, լրագրողի դիտարկմանը, թե այդ դեպքում ինչու է Թրամփը շնորհակալություն հայտնել, Սիրիայի նախագահն ասել է. «Դա նրա կատակներից մեկն է»։
