Կորոնավիրուսը նրանք են, ովքեր մինչև հիմա մեր պետական համակարգի օրգանիզմը քայքայում են։
Այս մասին այսօր՝ մարտի 12-ին Վայոց Ձորի մարզի Մալիշկա գյուղում «Այո»-ի քարոզարշավի ժամանակ ասաց Նիկոլ Փաշինյանը։
«Էդ կորոնավիրուսներին հատիկ-հատիկ պինցետով հանելու ենք ու տնական արաղով դեզինֆեկցիա անենք և ուղարկենք իրենց գործերին»,- ասաց նա։
Նիկոլ Փաշինյանը, դիմելով ժողովրդին նշեց, որ կարևոր է, որ բոլորը ապրիլի 5-ին քվեարկեն «ԱՅՈ» այն մտքով, որ Հայաստանի Հանրապետության ապագան կախված է մեկ մարդուց, և այդ մարդը Հայաստանի Հանրապետության յուրաքանչյուր քաղաքացին է։
«Ես ուզում եմ հավատալ նրան, որ այս իրավիճակը Հայաստանում անկախ անձերից՝ ով կլինի նախարար, վարչապետ ու պատգամավոր, այս իրավիճակը Հայաստանում երկար պիտի շարունակվի, որ Հայաստանում լինի կառավարություն, որ կարողանա ժողովրդին ասել՝ ժողովուրդ ջան, ես քո վրա հույս եմ դնում, և ժողովուրդն էլ կառավարությանը կարողանա նույնն ասել։
Եկեք բոլորս առաջնորդվենք այս կարգախոսով՝ Հայաստանն իմ օջախն է, ժողովուրդը՝ իմ ընտանիքը, մեզանից յուրաքանչյուրը պետք է այդպես ընկալի»,- նշեց Նիկոլ Փաշինյանը։