Եթե դուք իմ կենսագրական տվյալներին ծանոթ լինեիք, նման հարց չէիք բարձրացնի։ Այս մասին այսօր՝ մարտի 24–ին, ասել է Արցախի նախագահի թեկնածու Վիտալի Բալասնյանը՝ պատասխանելով Արցախի քաղաքացիներից մեկի այն հարցին, թե ընտրվելուց հետո արդյոք «10 թիկնապահներո՞վ են ման գալո՞ւ»։
Բալասանյանի խոսքով՝ ինքը լինելու է ժողովրդին հավասար մեկը. «Կարեւորում եմ, որ դուք մտահոգված եք։ Դեռեւս 1988 թվականի փետրվարի 22–ից եղել եմ հրամանատար, երբ հարձակվել են Ասկերանի վրա, առաջին մարտական մկրտությունս եմ ստացել։ Ամբողջ պատերազմական գործողությունների ժամանակ երբեւէ ձեր ասած թիկնապահներով ման չեմ եկել, 1994 թվականից առ այսօր թիկնապահներով ման չեմ եկել։ Ես լինելու եմ ձեզանից մեկը, ով հավասար քայլելու է ժողովրդի հետ»։
Քաղաքացիներն այլ հարցեր եւս հնչեցրել են, որոնցից մեկն էլ Արցախում կապի նոր օպերատորի վերաբերյալ է եղել։ Քաղաքացու խոսքով՝ Արցախում բջջային կապը բավականին թանկ է։
«Միանշանակ դուք ճիշտ եք, քանի որ մեր կապը ՀՀ–ի հետ համեմատած բավականին թանկ է։ Երկրորդ օպերատորի մասին մենք հայտարարություն կանենք իմ ընտրվելուց հետո։ Ունենք մոտավորապես 100 հազար բաժանորդ, շատ դժվար է, որ այս տարածքում հայտնվի երկրորդ օպերատորը, բայց մենք կանենք ամեն ինչ, որպեսզի երկրորդ օպերատորի մուտքը միշտ ազատ լինի, կվերանայենք այն պայմանագրերը, որ այսօր «Ղարաբաղ տելեկոմ»–ի հետ է կնքված, բայց համոզված եղեք՝ գնային քաղաքականությունը մենք վերանայելու ենք, ընդհուպ, եթե չհայտնվի երկրորդ օպերատորը»,– պատասխանել է Բալասանյանը։
