Բարձր տեխնոլոգիաների արդյունաբերության նախարարության կողմից հայտարարված դրամաշնորհային մրցույթին 133 նախագիծ մասնակցել է: Այս մասին այսօր կառավարության մամուլի կենտրոնում հրավիրված ասուլիսին հայտարարեց բարձր տեխնոլոգիաների արդյունաբերության նախարար Հակոբ Արշակյանը:
Ըստ նրա` մասնակիցները պետք է բազմատեսակ խնդիրների լուծումներ ներկայացնեն` կորոնավիրուսի տարածման կանխումից մինչեւ ծագած իրավիճակի հետ կապված սոցիալական հարցերի լուծումը:
Մրցույթը հայտարարվեց չորս հիմնական լոտերով՝ առաջին լոտը 2 միլիոն դրամ է, երկրորդը` 3 միլիոն, երրորդը` 5 միլիոն, չորրորդը` 10 միլիոն: Մրցույթի մասնակիցներն իրենք են որոշել, թե որ լոտին հավակնեն՝ ելնելով իրականացման համար անհրաժեշտ ֆինանսավորման չափից: Այս փուլում հայտերի ընդունման վերջնաժամկետն ավարտվել է, եւ գնահատող հանձնաժողովը պետք է որոշի հաղթողներին: Արշակյանի խոսքով` հաղթողները կորոշվեն եւ կհայտարարվեն այսօր կամ վաղը:
«Նախարարությունն ընդհանուր 133 դիմում է ստացել, որից 37-ը` գաղափարի փուլում, 59-ը` մշակման փուլում, եւ եւս 37-ը` կիրառման փուլում, այսինքն, պետք է մոդիֆիկացնել եւ կիրառել»,- ասաց նախարարը: Նախագծերի մեծ մասը վերաբերում էին մեկուսացված մարդկանց տեղաշարժի վերահսկմանը, տարեց եւ խնամքի կարիք ունեցող մարդկանց օգնությանը, սարքերի տվյալների հավաքագրմանը եւ առեւտրային եւ կրթական հարթակների ստեղծմանը:
