Հայաստանի ռազմարդյունաբերական համալիրը շարունակում է աշխատել իր ամբողջ ծավալով: Ապրիլի 8-ին հրավիրված ասուլիսին այս մասին ասաց բարձր տեխնոլոգիաների արդյունաբերության նախարար Հակոբ Արշակյանը` հիշեցնելով, որ, պարետատան որոշման համաձայն, ՀՀ ռազմարդյունաբերական համալիրը տնտեսական գործունեության այն տեսակներից է, որը թույլատրվում է արտակարգ դրության պայմաններում:
Նրա խոսքով` գործարանները շարունակում են աշխատել առկա պատվերների շրջանակներում: «Պաշտպանության նախարարության հետ մի շարք պայմանագրեր են ստորագրվել, եւ այժմ մենք մտել ենք արտադրության ակտիվ փուլ»,- ասաց նա:
Նախարարը տեղեկացրեց, որ այսօր քննարկումներ կանցկացվեն տեխնոլոգիական ընկերությունների ներկայացուցիչների հետ: «Այս քննարկումները տեւական են լինելու: Մենք ձգտում ենք հասկանալ, թե ինչ խնդիրների են բախվում մեր տեխնոլոգիական ընկերությունները եւ ինչ գործիքներ պետք է կիրառի պետությունը»,- հայտարարեց Արշակյանը: Հակոբ Արշակյանի խոսքով` պետությունն այժմ նոր հնարավորություններ է բացել այն ընկերությունների համար, որոնք ծառայություններ են մատուցում արտասահմանյան ընկերություններին, բայց այժմ պարապուրդի մեջ են կորոնավիրուսի համաճարակի պատճառով:
«Այն ընկերությունները, որոնք որոշակի խնդիրների են բախվել շուկայական իրավիճակի հետ կապված, կարող են օգտվել դրամաշնորհային ծրագրերից: Մենք դրանց մասին կհայտարարենք առաջիկա օրերին: Այն ընկերությունների մասնագետները, ովքեր այժմ հարկադիր պարապուրդի մեջ են հայտնվել, կարող են մասնակցել նախագծմանն ու արտադրությանը»,- ասաց Արշակյանը` հավելելով, որ դրամաշնորհային ծրագրերը լավ հնարավորություն են նոր ընկերություններ ստեղծելու համար: Նախարարի խոսքով` դրամաշնորհային ծրագրերի իրականացման համար այս տարի 930 միլիոն դրամ է նախատեսվել:
