Երկրում համաճարակով պայմանավորված արտակարգ դրության պայմաններում ազատազրկված անձանց իրավունքներն ու վերջիններիս առնչվող ցանկացած հարց ՀՀ ԱՆ ՔԿՀ-ներում և մարմիններում հասարակական վերահսկողություն իրականացնող հասարակական դիտորդների խմբի (այսուհետ՝ Խումբ) մշտական ուշադրության կենտրոնում է:
Այս անգամ Խումբը դիմել է ՀՀ Ոստիկանություն՝ խնդրելով տեղեկություն տրամադրել ազատազրկված անձանց՝ քրեակատարողական հիմնարկներից դատարան տեղափոխությունների և արտակարգ պայմաններում պահանջվող սանիտարահիգիենիկ նորմերի պահպանության վերաբերյալ:
Խմբի պաշտոնական հարցմանը ի պատասխան՝ ՀՀ ոստիկանությունը տեղեկացնում է, որ՝
«Հիմք ընդունելով «Հայաստանի Հանրապետությունում արտակարգ դրություն հայտարարելու մասին» ՀՀ կառավարության 2020 թվականի մարտի 16-ի թիվ 298-Ն որոշման և ՀՀ Պարետի որոշումների պահանջները՝ ՀՀ ԱՆ քրեակատարողական հիմնարկներից ազատությունից զրկված անձանց տեղափոխող մեքենաները յուրաքանչյուր երթից առաջ ախտահանվում են սանիտարահիգիենիկ նյութերով, իսկ ուղեկցող դասակի անձնակազմը ապահովված է ախտահանիչ նյութերով և անհատական պաշտպանիչ միջոցներով՝ դիմակներով և ձեռնոցներով։
Յուրաքանչյուր երթի ժամանակ տեղափոխվում է 1 ազատությունից զրկված անձ՝ մեքենայում անհրաժեշտ սոցիալական հեռավորությունը պահպանելու նպատակով:
Ազատությունից զրկված անձանց տեղափոխելու ընթացքում վերջիններիս քրեակատարողական հիմնարկների կողմից տրամադրվել են պաշտպանիչ միջոցներ»:
