Կորոնավիրուսի համավարակը դարձավ Հայաստանից ԱՄՆ կարեւոր այցի հետաձգման պատճառը: Այս մասին մայիսի 4-ին ԱԺ-ում Արտաքին հարաբերությունների մշտական հանձնաժողովի նիստում ԱԳՆ 2018-2019 թվականների գործունեության քննարկման ժամանակ ասաց ԱԳ նախարար Զոհրաբ Մնացականյանը՝ պատասխանելով պատգամավորների հարցերին:
Նրա խոսքով՝ հարաբերությունների օրակարգը ծավալուն է, երկկողմ հարաբերությունների զարգացման լավ ներուժ կա: Նախարարը հիշեցրեց, որ 2019 թվականին ԱՄՆ աջակցությունը 40 տոկոսով մեծացել է՝ հասնելով 60 մլն դոլարի:
Չնայած իր՝ ԱՄՆ-ի համար համավարակի ծանր հետեւանքներին, որոշում է ընդունվել Հայաստանին տրամադրել 1 մլն դոլարի օգնություն՝ հետեւանքների վերացման համար: Ինչ վերաբերում է Արցախին ցուցաբերվող օգնության կրճատմանը, ապա նախարարը նշեց, որ մեկնաբանություններում հակիրճ կլինի. խոսքը կոնկրետ ծրագրերի իրականացման մասին է, սա հետեւողական երկխոսություն է, եւ չարժե դրա մասին խոսել անցյալ կատարյալ ժամանակով:
