Կրեդիտայն քարտերի սպասարկման աշխարհի խոշորագույն ընկերություններից մեկը՝ ամերիկյան Mastercard-ը, իր աշխատակիցներին թույլ կտա տնից աշխատել՝ մինչեւ կորոնավիրուսի դեմ պատվաստանյութի հայտնվելը: Reuters գործակալությանը հայտնել է ընկերության գլխավոր մասնագետ Մայքլ Ֆրաքարոն:
«Մենք ակնկալում ենք, որ առաջիկա շաբաթների եւ ամիսների ընթացքում մեծ թվով աշխատակիցներ կշարունակեն աշխատել տնից... Այս առումով մեզ մոտ ամեն ինչ լավ է: Մենք կողմ ենք այս ընտրությանը»,- ասել էՖրաքարոն:
Ըստ նրա՝ Mastercard-ի աշխատակիցների մոտ 90 տոկոսը ներկայումս հեռավար կարգով է աշխատում:
«Հենց պատշաճ փորձարկումներ իրականացվեն եւ պատվաստանյութ հայտնվի, իսկ մարդիկ իրենց հարմարավետ կզգան վերադառնալու համար, մենք կկարողանանք ավելին տեսնել»,- շեշտել է Ֆրաքարոն, փոխանցում է «ՌԻԱ Նովոստի»-ն:
Առողջապահության համաշխարհային կազմակերպությունը մարտի 11-ին հայտարարել էր COVID-19 նոր կորոնավիրուսային վարակի բռնկման մասին: ԱՀԿ-ի վերջին տվյալներով՝ աշխարհում գրանցվել է հիվանդությամբ վարակման ավելի քան 4.7 միլիոն դեպք, մահացել է ավելի քան 318 հազար մարդ:
