Վարչապետ Նիկոլ Փաշինյանը վերջին ժամերին ակտիվ զբաղված է իր ֆեյսբուքյան էջում քաղաքացիներից ստացված վիդեոները տեղադրելով։
Ավելի վաղ նա իր քաղաքացիներին կոչ էր արել միանալ իր սկսած վիդեո չելենջին։
«Ժողովուրդ ջան վիդեո արեք, խնդրում եմ, դրեք Ձեր էջում, լինքը ուղարկեք ինձ, որ տեղադրեմ իմ էջում։ Շնորհակալ եմ»,– գրել էր նա։
Նշենք, որ վարչապետը քաղաքացիներին կոչ է արել տեսագրել հետևյալ տեքստը, որն ինքը վեց անգամ ասել էր ԱԺ––ում՝ արտակարգ դրությունը երկարացնելու՝ կառավարության որոշման քննարկման ժամանակ, եզրափակիչ ելույթի փոխարեն։
«Ուշադրություն, խոսում է ՀՀ քաղաքացի Այսինչ Այսինչյանը (սա որպես տարբերակ. ինքներդ ընտրեք՝ ինչպես ներկայանալ)։
Սիրելի հայրենակիցներ, Հայաստանի Հանրապետությունում կորոնավիրուսի համաճարակ է:
Բոլորիդ կոչ եմ անում կրել դիմակներ եւ դրանք հանել միայն սնվելիս: Դիմակը պետք է կրել այնպես, որ այն փակի ձեր քիթը եւ բերանը: Պարբերաբար ախտահանեք ձեր ձեռքերը եւ չախտահանված ձեռքերով մի դիպեք ձեր դեմքին:
Պահպանեք մեկուկես մետր սոցիալական հեռավորություն եւ բացառեք առանց դիմակի շփումը ձեր ընտանիքի անդամ չհանդիսացող անձանց հետ:
Սիրելի հայրենակիցներ, կրեք դիմակներ եւ դրանով կփրկեք հարյուրավոր կյանքեր:
Դիմակները անհրաժեշտ է փոխել երեք-չորս ժամը մեկ: Կարող եք օգտագործել ոչ միայն գործարանային արտադրության, այլեւ ձեր կողմից պատրաստած դիմակներ:
Սիրելի հայրենակիցներ,
շնորհակալություն եմ հայտնում մեր այն հայրենակիցներին, ովքեր պահպանում են հակահամաճարակային կանոնները կամ եթե նույնիսկ նախկինում չեն պահպանել, այս կոչին անսալով կսկսեն պահպանել դրանք»։