Կիրակի Կանադայի վարչապետ Ջասթին Թրյուդոն խոստացել է, որ հրապարակավ կպատվաստվի նոր կորոնավիրուսի դեմ, սակայն միայն այն բանից հետո, երբ պատվաստվեն մարդիկ, որոնց դա անհրաժեշտ է առաջին հերթին:
«Երբ իմ հերթը հասնի, ես սիրով կպատվաստվեմ հրապարակավ»,-հայտարարել է նա CBC հեռուստաալիքին տված հարցազրույցում: Նրա խոսքով՝ ինքը բոլորովին չի մտահոգվում, որ կորոնավիրուսի դեմ պատվաստանյութն ինչ-որ կերպ կարող է անդրադառնալ իր առողջության վրա, քանի որ լիովին վստահում է գիտնականներին եւ բժիշկներին: «Մենք տարիներ շարունակ վստահել ենք նրանց, երբ նրանք պաշտպանել են մեզ կարմրուկից եւ հարբուխից,-ասել է Թրյուդոն:-Եւ մենք վստահում ենք նրանց համավարակի առաջին օրից ի վեր»:
Թրյուդոն ընդգծել է, որ առաջինը կպատվաստվեն բժիշկները, սոցիալական ոլորտի աշխատակիցներն ու քաղաքացիների առավել խոցելի խմբերը: Հոկտեմբերի վերջում վարչապետը հայտնել էր, որ պատվաստվել է գրիպի դեմ կանխարգելիչ միջոցառումների շրջանակում:
Դեկտեմբերի 13-ին Կանադա է ժամանել կորոնավիրուսի դեմ պատվաստանյութ մատակարարող առաջին ինքնաթիռը, որը տեղափոխել է ամերիկյան Pfizer եւ գերմանական BioNTech ընկերությունների ստեղծած պատվաստանյութը, իսկ դեկտեմբերի 14-ին մեկնարկել են պատվաստումները: Թրյուդոն համոզմունք է հայտնել, որ պատվաստանյութի միջոցով համավարակը կհաջողվի հաղթահարել արդեն 2021 թվականին:
Օտավան պայմանագրեր է կնքել կորոնավիրուսի դեմ պատվաստանյութի մատակարարման մասին այնպիսի ընկերությունների հետ, ինչպես AstraZeneca-ն, Novavax-ը, Johnson & Johnson-ը, Pfizer-ը, Moderna-ն, Sanofi-ն եւ и GSK-ը (GlaxoSmithKline): Ընդհանուր առմամբ Կանադան ամրագրել է երկրի համար ապագա պատվաստանյութերի ավելի քան 300 մլն դեղաչափ, հաղորդում է ՏԱՍՍ-ը: