Եվրամիությունն ու Չինաստանը յոթ տարվա բուռն քննարկումներից հետո մտադիր են ներդրումների մասին երկար սպասված համաձայնագիր ստորագրել: Նախնական համաձայնագիրը պետք է հայտարարվի չորեքշաբթի օրը, ասել է բանակցություններին իրազեկ ԵՄ ներկայացուցիչը, հաղորդում է AP-ը:
Նրա խոսքով՝ գործարքը կնքվել է այն բանից հետո, երբ Չինաստանը պարտավորվել է վավերացնել Աշխատանքի միջազգային կազմակերպության հարկադիր աշխատանքի կանոնները: ԵՄ-ն հուսով է, որ համաձայնագիրը, որը հայտնի է որպես CAI, կօգնի շտկել շուկայի հասանելիության անհավասարակշռությունը եւ նոր ներդրումային հնարավորություններ կստեղծի Չինաստանում եվրոպական ընկերությունների համար՝ երաշխավորելով, որ նրանք կկարողանան հավասար պայմաններով մրցակցել երկրում:
ԵՄ-ն նախկինում հայտարարել էր, որ համաձայնագիրը, որը ներառում է վեճերի կարգավորման դրույթները, պետք է բարձրացնի Չինաստանի պետական սուբսիդիաների թափանցիկությունը եւ կայուն զարգացումը դարձնի ԵՄ-Չինաստան հարաբերությունների հիմնական տարրը: Գործարքը ներառում է նաեւ հստակ կանոններ` ընդդեմ տեխնոլոգիայի հարկադիր փոխանցման, պրակտիկա, որով կառավարությունը օտարերկրյա ներդրողներից պահանջում է կիսել իրենց տեխնոլոգիաները` շուկայի հասանելիության դիմաց: