Վրաստանի ոստիկանության աշխատակիցներ ավելի քան 20 մարդու են ձերբակալել «Միացյալ ազգային շարժում» ընդդիմադիր կուսակցության նախագահ Նիկա Մելիայի կալանավորման հատուկ գործողության ժամանակ, փոխանցում է «Sputnik Գրուզիան»:
Երեքշաբթի առավոտյան վրացի հատուկջոկատայինները կուսակցության գրասենյակում արցունքաբեր գազ էին կիրառել եւ ձերբակալել նրա նախագահ Մելիային: Վրացական Առաջին ալիքը տեղեկացրել է, որ կուսակցության գրասենյակի մոտ ձերբակալվել է ավելի քան 10 ցուցարար:
Հայտնի է դարձել, որ հատուկ գործողության ժամանակ ոստիկաններին չենթարկվելու պատճառով ձերբակալվել է 21 մարդ, հայտնում է պարբերականը;
Մելիան, որը ղեկավարում է նախկին նախագահ Միխայիլ Սաակաշվիլիի «Միասնական ազգային շարժում» ամենախոշոր ընդդիմադիր կուսակցությունը, մեղադրվում է 2019 թվականի ամռանը Թբիլիսիում հակառուսական ցույցի ժամանակ խորհրդարանի գրոհի կազմակերպման մեջ, ցույցերը սկսվել էին ռուս պատգամավոր Սերգեյ Գավրիլովի երկիր այցից հետո: Դատարանը նրան սկզբում գրավով ազատել էր՝ էլեկտրոնային ապարանջան կրելու պայմանով, որը ընդդիմադիրն ավելի ուշ ցուցադրաբար հանել էր, ինչի համար նրա նկատմամբ նոր գրավ էին ընտրել: Մելիան հրաժարվել էր վճարել դրամական գրավը, որից հետո խորհրդարանը նրան զրկել էր պատգամավորական անձեռնմխելիությունից՝ դրանով թույլատրելով ընդդիմադրի կալանավորումը: Փետրվարի 17-ին դատարանի ընդունած կալանքի մասին որոշումից հետո Մելիան փակվել էր իր կուսակցության գրասենյակում, դրսից նրան պահպանում էին մյուս ընդդիմադիրները, որոնք պնդում են, որ Մելիային չեն հանձնի ոստիկանությանը:
Վրաստանի վարչապետ Գեորգի Գախարիան հինգշաբթի հրաժարական էր տվել Մելիայի հարցում թիմի հետ տարաձայնությունների պատճառով: Նա անընդունելի էր համարում ընդդիմադրի ձերբակալությունը, որը, նրա կարծիքով, կարող էր երկրում առանց այն էլ լարված քաղաքական իրավիճակի էսկալացիա առաջացնել: Վրաստանի ՆԳՆ-ն վարչապետի հրաժարականից հետո կասեցրել էր Մելիային ձերբակալելու գործընթացը: Իշխող «Վրացական երազանք» կուսակցության քաղխորհուրդը Գախարիայի փոխարեն առաջադրել էր պաշտպանության նախարար Իրակլի Ղարիբաշվիլիի թեկնածությունը, որը երկուշաբթի ուշ երեկոյան նշանակվել էր վարչապետի պաշտոնում:
