Հայաստանի երկրորդ նախագահ Ռոբերտ Քոչարյանի եւ մյուսների գործով դատական նիստում ընդմիջումը ձգվում է:
Հիշեցնենք, որ դատավոր Աննա Դանիբեկյանն առաջին ընդմիջումը հայտարարեց, որպեսզի փաստաբաններին հնարավորություն տա ծանոթանալու դատախազի միջնորդությանը: Նա մտադիր է միջնորդել ՍԴ դիմելու մասին: Ակնհայտ է, որ խոսքը վերաբերելու է մեղադրանքի վերաորակմանը: Առաջին ընդմիջումից անմիջապես հետո դատավար Աննա Դանիբեկյանը հայտարարեց երկրորդը՝ դատավարության որոշ մասնակիցների բացակայության պատճառով:
Դահլիճում չեն երեւում ՀԱՊԿ նախկին գլխավոր քարտուղար Յուրի Խաչատուրովը եւ պաշտպանության նախկին նախարար Սեյրան Օհանյանը, ինչպես նաեւ նրանց փաստաբանները: Երկու գեներալ-գնդապետները մեղադրվում են բացառապես ՔՕ 300.1 հոդվածով:
Սա արդեն երկրորդ դատական նիստն է Սահմանադրական դատարանի որոշումից հետո, որը ՔՕ 300.1-րդ հոդվածը ՀՀ Սահմանադրության 78 եւ 79-րդ հոդվածներին հակասող եւ անվավեր էր ճանաչել: Մարտի 25-ին ՍԴ-ն հրապարակել էր որոշման եզրափակիչ մասը, իսկ մարտի 29-ի երեկոյան՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: ՍԴ-ն 300.1 հոդվածը համարել էր անորոշ իրավունքի եւ մեղսագրվող արարքի տեսակետից, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, իսկ փորձել են կիրառել մեկ այլ Սահմանադրությամբ: Ռոբերտ Քոչարյանը, Յուրի Խաչատուրովը, Սեյրան Օհանյանը եւ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդումը վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ: