Ուկրաինայի նախագահ Վլադիմիր Զելենսկին հայտարարել է իր ռուս գործընկեր Վլադիմիր Պուտինի հետ հանդիպում կազմակերպելու համար բանակցություններ սկսելու մասին:
Նրա խոսքով՝ Պուտինի հետ հանդիպումը տեղի կունենա կամ Դոնբասում, կամ չեզոք տարածքում:
Ասուլիսի ժամանակ նա հայտարարել է, որ հանդիպումը հաստատ Մոսկվայում չի կայանա: «Ռուսաստանի նախագահն առաջարկել է հանդիպումն անցկացնել Մոսկվայում: Բայց ավանդաբար հակամարտության ընթացքում նման հանդիպումներն անցկացվում են հակամարտության վայրում կամ չեզոք տարածքում»,- ասել է նա, փոխանցում է «Նովոյե վրեմյա» ուկրաինական պորտալը:
Զելենսկին հայտնել է, որ իր գրասենյակը բանակցություններ է վարում Մոսկվայի հետ՝ հանդիպումը կազմակերպելու համար:
Ուկրաինայի նախագահը նաեւ ափսոսանք է հայտնել, որ Ֆրանսիան եւ Գերմանիան վերջերս թուլացրել են իրենց դիրքերը Ռուսաստանի Դաշնության նկատմամբ Նորմանդական ձևաչափում՝ նշելով, որ նրանցից ավելի ուժեղ աջակցություն է ակնկալում Ուկրաինային: Նա նշել է, որ դա պայմանավորված է տնտեսական իրավիճակով, պատժամիջոցների պատճառով այդ երկրների ներսում բիզնեսի ճնշմամբ, այդ թվում՝ Գերմանիայի դեպքում, դեր է խաղում «Հյուսիսային հոսք 2»-ի պատճառով պատժամիջոցների ճնշումը:
«Դժվար, շատ դժվար ընտրություն է: Բայց ես դեռ գիտեմ, որ նրանք աջակցում են Ուկրաինային, այժմ կան համակարգված կլաստերներ պատերազմի դադարեցման մասին, կլաստերներ Գերմանիայի եւ Ֆրանսիայի միջեւ: Ռուսական կողմից համաձայնություն չկա»,- ասել է Զելենսկին:Հարցին՝ արդյոք նախագահը հույս ունի լուծել պատերազմի հարցը Դոնբասում մինչ իր պաշտոնավարման ավարտը, Զելենսկին չի պատասխանել: Նա շեշտել է, որ իր համար գերխնդիր է մնում պատերազմի եւ տարածքների «բռնազավթման» խնդրի լուծումը: «Ես կցանկանայի ասել, որ դա այլեւս առաջնահերթ խնդիր չէ, որ մենք ամեն ինչ տուն ենք վերադարձրել, ամեն ինչ Ուկրաինայում է, ամեն ինչ մեր վերահսկողության տակ է: Ցավոք, դա տեղի չի ունենում»,- ասել է նա, հայտնում է «Գորդոն» պորտալը:
