YouTube-ը հեռացրել է տեսանյութը, որը հրապարակել է Բրազիլիայի նախագահ Ժաիր Բոլսոնարուն, քանի որ նրանք տարածում են ապատեղեկատվություն կորոնավիրուսի մասին, հաղորդում է BBC-ն։
Տեխնոլոգիական հսկան հայտարարել է, որ որոշումը հիմնված է ոչ թե գաղափարախոսության կամ քաղաքականության վրա, այլ կոնտենտի նկատմամբ դրա քաղաքականության վրա։
Համավարակի ամենասկզբից ի վեր նախագահը դեմ էր մեկուսացմանը, դիմակներին եւ պատվաստումներին։ Տեղական ԶԼՄ-ների հաղորդագրություններով՝ նրա գրասենյակը չի մեկնաբանել YouTube-ի որոշումը, որն անդրադառնում է 15 տեսանյութերին։
Նրա ալիքում ամեն օր հրապարակվում են համազգային ուղերձներ ու նախարարների հետ զրույցներ տարբեր հարցերով, որոնց մի մասը հեռարձակվում է ուղիղ եթերում։
O Globo լրատվական գործակալության համաձայն՝ տեսանյութերից մեկում Բրազիլիայի առողջապահության նախկին նախարար Էդուարդո Պասուելոն համեմատում է կորոնավիրուսը ՁԻԱՀ-ի հետ։ CNN-ի մեկ ուրիշ տեսանյութում բրազիլացի բժիշկը խորհուրդ է տվել հիդրոքսիխլորոխինը, մալարիայի դեմ դեղամիջոցն ու իվերմեկտին հակամակաբուծային դեղամիջոցը՝ որպես Covid-19-ի դեմ բուժման միջոց։ Դեռեւս դրանց արդյունավետությունը վիրուսի բուժման գործում ապացուցված չէ։
YouTube-ը հայտարարել է, որ թույլ չի տալիս տեղադրել իր հարթակում կոնտենտ, որը գովազդում է այդ դեղամիջոցներից ցանկացածը՝ որպես արդյունավետ բուժման ձեւ։ Հարթակը նաեւ հայտարարել է, որ դրա կանոններն արգելում են տեսահոլովակներ, որոնցում ասվում է, որ դիմակները չեն օգնում կանխարգելել վիրուսի տարածումը։
Դա առաջին դեպքը չէ, երբ խոշոր թվային հարթակներն արգելափակում են նախագահ Բոլսոնարուի տեսանյութերը։ Անցած տարի Twitter-ն ու Facebook-ը հեռացրել էին տեսանյութերը, որոնցում նա հանդես էր գալիս սոցիալական հեռավորության դեմ եւ պնդում էր, որ դեպքերի մեծ թիվը կդարձնի Բրազիլիան Covid-ի նկատմամբ դիմակայուն։