Վրաստանի նախկին նախագահ Միխայիլ Սաակաշվիլին, որը պատիժը կրում է Ռուսթավիի թիվ 12 բանտում, հրաժարվել է բուժօգնությունից գիտակցությունը կորցնելու դեպքում։

Վրաստանի երրորդ նախագահը վրացական իշխանությունների կողմից կալանավորվել է հոկտեմբերի 1-ին։ Նույն օրը նա հացադուլ է հայտարարել։

«Ես չեմ ցանկանում վշտացնել ընտանիքիս եւ մերձավորներիս, բայց նախապես հրաժարվում եմ բժշկական օգնությունից գիտակցությունս կորցնելու դեպքում, եւ ցանկացած բժշկական միջամտությունից։ Ես սա գրում եմ ոչ նրա համար, որ վշտացնեմ, այլ, ընդհակառակը, որպեսզի դուք ավելի ակտիվ լինեք։ Ես ձեզ բոլորիդ շատ եմ սիրում»,- գրել է Սաակաշվիլին, տեղեկացնում է «Sputnik-Գրուզիա»-ն։

Նախկին նախագահի խոսքով՝ նա վերադարձել է Վրաստան, որպեսզի օգնի ժողովրդին վերականգնել ազատությունն ու դեմոկրատիան։

«Եթե ես այլեւս չկարողանամ օգնել սեփական ժողովրդիս իմ գոյությամբ, ես պատրաստ եմ ապացուցել ինքնազոհությամբ, որ հանուն Վրաստանի արժե ապրել ու արժե մեռնել»,- գրել է Սաակաշվիլին։

Վրաստանի նախկին նախագահը մեղադրվում է պաշտոնեական հանցագործությունների մեջ, երկու գործով հեռակա արդեն դատավճիռ է կայացված, որը նախատեսում է պատիժ մինչեւ վեց տարի ազատազրկմամբ, մյուս գործերը գտնվում են վարույթում։

Շուտով նրան կներկայացվի եւս մեկ մեղադրանք՝ պետական սահմանի ապօրինի հատում։ Վրաստանի դատախազությունում հայտարարում են, որ Սաակաշվիլուն Ուկրաինային արտահանձնման հարցը չի դիտարկվում եւ պատիժը կրելու է հայրենիքում։