Հստակ պատճառաբանություն չներկայացվեց՝ ինչու Աղավնոյի անցակետում չթույլատրվեց մեր գործըներկերների մուտքը Արցախ. ցուցակով շրջող ռուս խաղաղապահներն ասում էին, որ իրենք հրաման ունեն մեզ թույլ չտալու մուտք գործել Արցախ։ Այս մասին NEWS.am-ի հետ զրույցում նշեց ԱԺ «Հայաստան» խմբակցության պատգամավոր Ագնսեսա Խամոյանը:
«Այս մասով երեկ ԱԳՆ–ն հայտարարություն տարածեց, թե մտահոգված են, նույնն այսօր կրկնեց Նիկոլ Փաշինյանը ԱԺ ամբիոնից և հղում արեց նոյեմբերի 9-ի եռակողմ հայտարարությանը։
Եթե Նիկոլ Փաշինյանը հղում է անում նոյեմբերի 9–ի եռակողմ հայտարարությանը, հիշեցնում եմ, որ այդ եռակողմ հայտարարության ստորագրողներից մեկն էլ ինքն է։ Եվ մեր պահանջը որպես ՀՀ քաղաքացիներ կարող է լինել Հայաստանի Հանրապետության իշխանությունից և ոչ թե Ադրբեջանից ու Ռուսաստանից։
Եթե ԱԳՆ–ն ու Նիկոլ Փաշինյանն ազնիվ են իրենց հայտարարություններում, չպետք է բավարարվեին միայն բանավոր մտահոգություն հայտնելով և եթե հղում են անում նոյեմբերի 9–ի հայտարարությանը եւ հայտարարում են, որ խախտվել է կետերից մեկը, ապա պարտավոր են կատարել այդ կետը՝ ապահովել կապույտ անձնագիր ունեցող քաղաքացիների անխափան ելք ու մուտքը Արցախ:
Եթե Նիկոլ Փաշինյանը, ՀՀ իշխանությունը որեւէ գործնական քայլ չի ձեռնարկում այդ կետը պահելու համար, ապա ստացվում է, որ ազնիվ չեն իրենց հայտարարությունների մեջ եւ ստացվում է, որ իրավիճակն ինչ-որ առումով ձեռնտու է նաեւ իրենց, եւ կարող է նաեւ արդարացնել իր՝ Արցախ չգնալը»,-հայտարարեց Ագնեսա Խամոյանը:
Նա ընդգծեց, որ ՀՀ իշխանությունները պարտավոր են քայլեր ձեռնարկել և պատասխաններ պահանջել, թե ինչու է անհնարին դարձել ընդդիմադիր պատգամավորների մուտքը Արցախ:
Ավելի վաղ NEWS.am-ը հայտնել էր, որ նախօրեին Հայաստանի ԱԺ ընդդիմադիր պատգամավորներին թույլ չեն տվել մուտք գործել Արցախ: Դրա վերաբերյալ հայտարարություն էր տարածել Հայաստանի ԱԳՆ-ն՝ նշելով, որ մտահոգված է, որ ԼՂ-ում ՌԴ խաղաղապահ զորախմբի ծառայողները չեն թույլատրել ԱԺ մի խումբ պատգամավորների մուտքը Արցախ:
