Մի շարք արաբական երկրներ սուր քննադատության են ենթարկել աջ ծայրահեղականներին՝ Շվեդիայում Ղուրանը այրելու ակտի համար, հայտնում է ТАСС-ը՝ հղում անելով Sky News Arabia-ին։
«Մենք խստորեն դատապարտում ենք Ղուրանի այրումը Շվեդիայում։ Նման գործողություններն ուղղված են միայն ատելության հրահրմանը եւ բռնության խթանմանը»,- մեջբերում է նա Բահրեյնի ԱԳՆ-ի հայտարարությունը։
Սաուդյան Արաբիայի ղեկավարությունը նշել է, որ «[Դանիական աջ ծայրահեղական «Կոշտ կուրս» կուսակցության առաջնորդ] Ռասմուս Փալուդանի կողմնակիցները միտումնավոր սադրում են մահմեդականներին եւ պղծում նրանց սուրբ խորհրդանիշները»։
Հորդանանի արտգործնախարարության պաշտոնական ներկայացուցիչ Հայթամ Աբու ալ-Ֆուլն ընդգծել է, որ «այդ գործողությունները հակասում են հավատքի եւ հավմոզմունքների ազատությանը, ինչպես նաեւ խախտում են ժողովուրդների խաղաղ գոյակցության սկզբունքները»։ Նա կոչ է արել միջազգային հանրությանը միավորել ուժերը՝ ծայրահեղականության ու անհանդուրժողականության գաղափարների դեմ պայքարելու եւ կրոնական հողի վրա վիրավորանքները կանխելու համար։
Իրաքի ԱԳՆ-ն իր հերթին կանչել է Բաղդադում Շվեդիայի գործերի ժամանակավոր հավատարմատարին եւ խստորեն զգուշացրել շվեդ դիվանագետին Ղուրանի պղծման կապակցությամբ։ Իրաքի իշխանությունները հայտարարել են, որ «այդ խնդիրը լուրջ հետեւանքներ է առաջացնում Շվեդիայի եւ արաբ-մահմեդական աշխարհի հարաբերությունների համար»։
Հինգշաբթի օրը շվեդական մի շարք քաղաքներում անկարգություններ են սկսվել այն բանից հետո, երբ հայտնի է դարձել, որ Փալուդանը մտադիր է դրանցում հակաիսլամական ցույցեր՝ Ղուրանի հրապարակային հրկիզումներ կազմակերպել։