Նախընտրելի
Թուրքիայի Մարմարիս քաղաքում ոստիկանությունը ձերբակալել է չորս մարդու՝ ՆԱՏՕ-ի առաքելության շրջանակում նավահանգստում գտնվող Ֆրանսիայի ռազմածովային ուժերի ֆրեգատի մոտ տեղի ունեցած բողոքի ակցիայից հետո։ Այս մասին հայտնում է Turkish Minute-ը։
Պարբերականի տվյալներով՝ ակցիայի մասնակիցները եղել են ձախակողմյան Կարմիր կուսակցության ակտիվիստներ՝ Թուրքիայի Աշխատավորական կուսակցությունից առանձնացած խմբակցություն։ Նրանք ցույց են անցկացրել «Ալբատրոս» նավամատույցի մոտ, որտեղ հունիսի 20-ին խարիսխ է գցել 151 հոգուց բաղկացած անձնակազմով Guepratte ֆրանսիական ֆրեգատը։
Հաղորդվում է, որ բողոքողները ձերբակալվել են և պահվել են կալանքի տակ, մինչ ոստիկանությունը նրանցից ցուցմունքներ էր վերցնում։ Նրանց հարցաքննել են ատելություն և թշնամանք հրահրելու մեղադրանքով։
Ակցիան տեղի է ունեցել ձախ խմբերի հակաՆԱՏՕ-ական ելույթների ակտիվացման ֆոնին՝ ՆԱՏՕ-ի գագաթնաժողովից առաջ, որը պետք է կայանա Անկարայում հուլիսի 7–8-ին։ Թուրքիայում նման բողոքները վաղեմի պատմություն ունեն, հատկապես Դաշինքի օբյեկտների տեղակայման շրջաններում։
Հաղորդվում է նաև, որ գագաթնաժողովի նախաշեմին Անկարայի իշխանությունները խստացնում են անվտանգության միջոցառումները մայրաքաղաքում՝ ներառյալ ենթակառուցվածքների նախապատրաստումը և լրացուցիչ հանձնարարականները քաղաքային ծառայություններին։
