Կիևում Ուկրաինայի նախագահ Վլադիմիր Զելենսկու բանակցությունների առաջին փուլն ԱՄՆ նախագահի հատուկ բանագնացներ Սթիվ Ուիթքոֆի և Ջարեդ Քուշների հետ ավարտվել է։ Շուտով կսկսվի ընդլայնված փուլը՝ Մեծ Բրիտանիայի, Ֆրանսիայի և Գերմանիայի ներկայացուցիչների մասնակցությամբ, «Европейская правда»-ին է հայտնել Զելենսկու մամուլի քարտուղար Սերգեյ Նիկիֆորովը։

Ուկրաինական պատվիրակության առաջին հանդիպումը ԱՄՆ նախագահի ներկայացուցիչների հետ տեղի է ունեցել սեպտեմբերի 6-ի երեկոյան։ Ըստ Զելենսկու, Կիևում բանակցությունները կանցնեն մի քանի նստաշրջաններով․ նախ Ուկրաինան հարցեր կքննարկի ամերիկյան ներկայացուցիչների հետ, որից հետո բանակցություններին կմիանան «եվրաեռյակի» երկրների ազգային անվտանգության հարցերով խորհրդականները։

Մեծ Բրիտանիայի, Ֆրանսիայի և Գերմանիայի ներկայացուցիչներն արդեն ժամանել են Կիև՝ բանակցություններին մասնակցելու համար։

Ուիթքոֆն ու Քուշները սեպտեմբերի 6-ին գնացքով ժամանել են Ուկրաինայի մայրաքաղաք։ Ավելի վաղ Զելենսկին հայտարարել էր, որ Ուկրաինան պատրաստվում էր նրանց դիմավորել օդանավակայանում, սակայն, ըստ նրա, Ռուսաստանի հարվածները թույլ չեն տվել ամերիկացի բանագնացներին օգտվել ինքնաթիռից։

Նախօրեին Ուիթքոֆն ու Քուշները Մոսկվայում ավելի քան երեք ժամ բանակցել են Ռուսաստանի նախագահ Վլադիմիր Պուտինի հետ։ ՌԴ նախագահի օգնական Յուրի Ուշակովը հայտարարել է, որ ռուսաստանյան կողմն ամերիկյան ներկայացուցիչներին ներկայացրել է իր դիրքորոշումը և վստահություն հայտնել դրված նպատակներին հասնելու հարցում։ Սպիտակ տանը բանակցությունները բնութագրել են որպես բովանդակալից և հայտնել, որ հաջորդ քայլերի մասին նախատեսվում է հայտարարել առաջիկա շաբաթներին։