Հայաստանում կանցկացվի հայ-թուրքական բիզնես ֆորում։ Այս մասին հոկտեմբերի 15-ին Երևանում ԵԱՀԿ գործող նախագահ Իգնասիո Կասիսի հետ համատեղ մամուլի ասուլիսի ժամանակ հայտարարել է ԱԳՄԱ նախարար Արարատ Միրզոյանը։

Պատասխանելով Թուրքիայի հետ սահմանի բացման հարցում լավատեսության հիմքերի և նոր բանակցողի վերաբերյալ հարցին՝ նախարարը նշել է, որ աշխարհում պետությունների միջև բանակցությունները մշտական բնույթ են կրում, և, որպես կանոն, քանի դեռ դրանք ավարտված չեն ու արդյունք չկա, դրանց մասին չի հաղորդվում։ Թուրքիայի հետ բանակցությունները բացառություն չեն, սակայն կողմերը գրեթե ամենօրյա երկխոսության մեջ են, հայտնեց Միրզոյանը։

Խոսելով վերջին շրջանի ձեռքբերումների մասին՝ նա հիշեցրեց Հայաստանի հետ ուղիղ առևտրի արգելքի վերացումը Թուրքիայում, Անիի կամրջի համատեղ վերականգնումը, ինչպես նաև Գյումրի-Կարս երկաթգծի վերագործարկման նախագիծը։ Այս համատեքստում նա առաջարկեց այցելել Ախուրիկ և անձամբ համոզվել իրականացվող աշխատանքների ծավալում։ Ավելին, սահմանը «մասնակիորեն բացվել է» Թուրքիայում կայացած համաժողովին մասնակցող գործարար պատվիրակության համար։ Համաժողովն այնքան հաջողված է եղել, որ կողմերը ցանկացել են շարունակել այն արդեն Հայաստանում։

Ինչպես ընդգծեց Միրզոյանը, վերջնական նպատակը դիվանագիտական հարաբերությունների պաշտոնական հաստատումն է (չնայած շփումներն ու երկխոսությունն առկա են) և սահմանի ամբողջական բացումը։ Նրա խոսքով՝ գործընթացը բավականաչափ հասունացել է։ Ճշտող հարցին, թե հայտնի է արդյոք նոր բանակցողի անունը, Միրզոյանը հայտարարեց, որ նոր բանակցողի անհրաժեշտություն կարող է և չլինել, քանի որ սահմանը կարող է դրանից շուտ բացվել։