Հայաստանի Հանրապետության տրանսպորտի եւ կապի նախարար Գագիկ Բեգլարյանը հոկտեմբերի 2-ին ընդունել է Ասիական զարգացման բանկի /ԱԶԲ/ պատվիրակությանը՝ ԱԶԲ-ի Հյուսիս-հարավ ծրագրի ղեկավար Արտո Ահոնենի գլխավորությամբ:

ՏԿՆ մամուլի ծառայությունից հայտնում են, թե հանդիպման ընթացքում քննարկվել են Հյուսիս-հարավ ճանապարհային միջանցքի Երրորդ տրանշի՝ Թալին-Գյումրի 45,7 կմ հատվածի բարելավման եւ վերակառուցման հայտը, ինչպես նաեւ առաջիկա մեկ տարվա ընթացքում Հյուսիս-հարավ ծրագրի ամբողջական եւ մանրամասն նախագծերի պատվիրման եւ պատրաստման հնարավորությունները: Հստակեցվել են նաեւ Տրանշ 3-ով նախատեսված բանակցություններին եւ ստորագրվելիք վարկային համաձայնագրերին առնչվող հարցեր։

Գագիկ Բեգլարյանը հանձնարարել է սկսել ճանապարհահատվածի տեխնիկական ուսումնասիրության աշխատանքները, քանի որ այն բավականին բարդ եւ երկար ժամանակ պահանջող գործընթաց է: 

Նախապատրաստական աշխատանքների ավարտից հետո կհայտարարվի մրցույթ՝ Հյուսիս-հարավ ճանապարհային միջանցքի Երրորդ տրանշի շինարարական աշխատանքների համար: